«Ֆուտզալ Բիզնես լիգա». Լրագրողները 14:2 հաշվով ջախջախեցին ԱԺ-ի թիմին

Մարզական մեկնաբան Կարեն Գիլոյանի գլխավորությամբ հանդես եկող լրագրողները շատ դիտարժան ու վստահ հանդիպում են անցկացրել ու հաղթել 14:2. հաշվով:

Հանդիպումից հետո երկու թիմերի խաղացողներն ու մարզիչը  Mediamax Sport-ի թղթակցի հետ ամփոփել են հանդիպումը:

Կարեն Գիլոյան (մարզիչ)

Մինչ այս խաղն էլ 2:0 հաշվով ենք հաղթել նրանց, բայց ֆուտզալում բոլորովին այլ են պահանջները, խաղի տրամաբանությունն է տարբերվում: Մենք առավելություն ունեինք ողջ խաղի ընթացքում, ինչպես միշտ հաղթանակի համար էինք պայքարում ու հասանք դրական արդյունքի:

Դավիթ Ալավերդյան (լրագրողների թիմի ավագ)

Հատկապես երկրորդ խաղակեսում հակառակորդը որեւէ կերպ չէր կարողանում դիմադրել: Մենք ամեն կիրակի իրար հետ խաղում ենք, շատ լավ գիտենք միմյանց ու միշտ ձգտում ենք հաղթանակի:

Շատ ուրախալի է ֆուտբոլի դաշտում թե կառավարության, թե ԱԺ-ի հետ մրցել ու հաղթել: Այն հարաբերությունները, որոնք դաշտում ձեւավորվել են լրագրողների ու պատգամավորների միջեւ, կօգնեն նաեւ աշխատանքում:

Ձգտելու ենք մյուս խաղերում էլ հաղթել ու դուրս գալ հաջորդ փուլ:


Էդուարդ Շարմազանով (ԱԺ փոխնախագահ)

Լրագրողների հետ արդեն երկրորդ հանդիպումն անցկացրինք, մինչ այդ մենք «Հրազդան» ստադիոնում զիջել էինք: Լրագրողների թիմը շատ ուժեղ է, կազմակերպված ու մարտունակ, միշտ միասին խաղում են, լավ գիտեն իրար: Իսկ մենք ընդամենը մեկ անգամ ենք այս կազմով մարզվել: Ժամանակ չենք ունենում ավելի շատ մարզվել:

Նման հաշիվ չէի սպասում, խաղը 3:0 հաշվից հետո կոտրվեց: Հետագա խաղերում հնարավոր է համալրումներ ունենանք:

Սամվել Ֆարմանյան (ԱԺ պատգամավոր)

Մրցաշարը շատ լավ է կազմակերպվել, ու հետաքրքիր հանդիպումներ են անցկացվում: Լրագրողների թիմն ուժեղ է ու կարողացավ հաղթանակի հասնել:

Խաղի նկատմամբ հետաքրքրությունը շատ մեծ էր, այն ցուցադրվեց ուղիղ եթերում ու անգամ խաղադրույքներ էին ընդունվում: Ես էլ էի կատարել,որ Նեյմարի հետ գոլերի հեղինակ կդառնանք: Ի տարբերություն Նեյմարի, ինձ դա անել հաջողվեց: