Путин чайлдфрины пропагандалаган өчен 5 млн сумга кадәр штраф турындагы законны имзалады

РФ Президенты Владимир Путин имзалаган закон нигезендә, россиялеләрне чайлдфрины пропагандалаган өчен штрафка тарта башлаячаклар. Искәртеп узабыз, әлеге идеология бала табудан баш тартуны күздә тота.

Дәүләт Думасы Рәисе Вячеслав Володин элегрәк хәбәр иткәнчә, әлеге идеяне пропагандалаган өчен физик затларны – 400 мең, вазифаи затларны – 800 мең, ә юридик затларны 5 миллион сумга кадәр штраф көтә.

«Дус һәм зур гаилә – көчле дәүләтнең нигезе», - дип искәртте Володин.

Билгеләп үтелгәнчә, монахлык һәм монахларча яшәү рәвеше турында мәгълүмат тарату, өйләнмәскә (кияүгә чыкмаска) ант итү һәм алар белән бәйле рәвештә бала табудан баш тарту (әлеге карар дини оешманың эчке законнарына нигезләнгән очракта) канун бозу саналмаячак.