Татарстанда махсус сакланыла торган табигать территорияләрен контрольдә тоту катгыйлана

Татарстанда махсус сакланыла торган табигать территорияләренең (МСТТ) торышын контрольдә тотуны катгыйландыралар. Татарстан Республикасы Министрлар Кабинетының бу карарына республика Премьер-министры Алексей Песошин имза куйган.

Хәзер махсус саклана торган табигать территорияләрен саклауга һәм файдалануга карата мәҗбүри таләпләрне бозу куркынычы индикаторы булып өстәмә рәвештә төбәк әһәмияттәге МСТТ яисә төбәк әһәмиятендәге МСТТ саклау зонасының пычрануы турында мәгълүмат керүе саналачак.

Татарстан Биоресурслар буенча дәүләт комитетында контрольдә тотучы затларның хуҗалык эшчәнлеген гамәлгә ашыру турында дөрес булмаган мәгълүмат тапшырулары турында белешмәләр алуы да куркыныч индикаторларга кертелгән.

Документта билгеләп үтелгәнчә, бу мәгълүматлар гражданнарның, юридик затларның һәм шәхси эшмәкәрләрнең мөрәҗәгатьләрендә һәм гаризаларында, дәүләт хакимияте һәм җирле үзидарә органнары мәгълүматларында, шулай ук массакүләм мәгълүмат чаралары хәбәрләрендә булырга мөмкин.

Элек мәҗбүри таләпләрне бозу куркынычы индикаторы булып алдагы өч ел дәвамында МСТТ яисә аның саклау зонасы чикләрендә урнашкан җир кишәрлекләрендә сирәк һәм юкка чыгу куркынычы янаган үсемлекләр төрләренең санының якынча 20 проценттан артыгы кимүе генә саналган.

Үзгәрешләр махсус сакланыла торган табигать территорияләрен саклау һәм алардан файдалану өлкәсендә төбәк дәүләт контроле (күзәтчелеге) турында 2021 елның сентябрендә расланган нигезләмәгә кертелә.