Теше сызлаган ир-атның авызында энә сына, табиб кисеп карый, аннары ир-ат энәне йота

Мәскәү өлкәсендәге Люберцы шәһәрендә стоматолог пациентның авызында сынган энә кисәге калдырган. Бу турыда «Московский комсомолец» яза.

Сынган энә ир-атның теш казналыгына кадалып калган. Хәзер ул табибтан компенсация алырга тели.

Машина йөртүче булып эшләүче 33 яшьлек ир-атның теш бик каты сызлый, ул аскы казналыгындагы тешен алдырырга стоматологка килә. Табиб анестезияне аскы казналыкка ясый, казналык сөягенә эләккән энә 30 градуска бөгелә. Ир-ат кычкырып җибәрә, табиб шприцны авыздан тартып чыгара, аннары авыруны тынычландыра да бөгелгән энәне кабат теш казналыгына кадый. Шул чакта энә төбеннән сына да теш казналыгына кадалып кала.

Энә калдыгын тартып чыгару өчен стоматолог аскы казналыкта кисем ясый. Тик барыбер энә калдыгын ала алмый. Ачуы чыккан пациент мәгънәсез шөгыльне ташларга сорый һәм Жуковский өлкә клиник хастаханәсенә үзе китә. Юлда ир-ат энәне йотып җибәрә.

Хастаханәдә дежур хирург пациентны карагач, яраны эшкәртә. Ул стационарга ятып дәваланырга киңәш итә. Ир-ат ризалаша. Аннары хастаханәгә «ашыгыч ярдәм» чакыралар һәм ир-атны башка хастаханәгә алып китәләр.

Ир-ат әлеге хәлгә бик ачулы, ул хокук саклау органнарына гариза язып, стомотологны җаваплылыкка тартырга тели, диелә хәбәрдә.