Миләүшә Сафинаның кызына операция ясаганнар

Җырчы Миләүшә Сафинаның физик мөмкинлекләре чикле кызы Мәрьямгә операция ясаганнар. Ул Мәрьямнең хәрәкәтләнүен аз булса да җиңеләйтергә тиеш. Кызын табиблар кулына тапшырганнан соң, җырчы сторисларында әлеге операцияне ни өчен ясатырга уйлауларын сөйләде.

«Операция озак булмый, 15-20 минут, диделәр. Казанга Туладан ярты елга бер табиблар килеп тора. Бу операцияне узган ел ук ясатырга теләгән идек, ул вакытта Мәрьям салкын тидерде. Җәй көне дә, ни сәбәпледер, килеп чыкмады. Шушы көннәрдә табиблардан кайчан киләчәкләрен сораган идем, шушы ялларда, диделәр. Бөтен эшемне ташлап, тиз-тиз анализлар тапшырдык та операциягә килдек. Мөмкинлек булганда ясатырга булдык.

Тула табибларының безнеке кебек балаларга ярдәм күрсәтү буенча тулы бер методикасы бар. Алар хәрәкәтләнергә ирек бирмичә катып, тартылып торган сеңерләрне лазер белән кисәләр. Тез төбеннән, терсәктән. Мәсәлән, безнең Мәрьямнең аягы инде тураймый. Сеңерләрен кискәч, турая башларга тиеш. Әлбәттә, нәтиҗәсе булсын өчен, алга таба да тернәкләнү узарга кирәк булачак», – дип сөйләде җырчы бу турыда.

Мәрьям – Миләүшә Сабированың иң олы баласы. Ул туган вакытта гипоксия алып, ятып кына тора торган бала булып калды. Миләүшә Сафина Мәрьямне озак еллар ялгызы гына тәрбияләде. Хәзер җырчы кияүдә, тормыш иптәше белән, Мәрьямнән тыш, тагын 2 малай үстерә, бизнес белән шөгыльләнә. Соңгы арада яңа җырлары белән сәхнәләрдә дә күренә башлады.