AFC Осиё Чемпионлар Лигаси ўйинларини кўчиришга қарор қилди

Осиё футбол конфедерацияси (AFC) минтақавий Чемпионлар Лигаси доирасидаги бир қатор учрашувлар бошқа саналарга кўчирилганини маълум қилди. Ўйинлар Абу-Даби, Дубай ва Доҳада ўтказилиши белгиланган эди. Бу ҳақда euro-football.ru хабар беради.

Қарорга Эрон, АҚШ ва Исроил ўртасидаги ҳарбий кескинлик сабаб бўлди. Хабарда қайд этилишича, Эрон томонидан учирилаётган снарядлар минтақадаги қўшни давлатлар ҳудудига ҳам етиб бормоқда, бу ерларда АҚШ ҳарбий базалари жойлашган.

AFC баёнотида ташкилот вазиятни диққат билан кузатиб бориши ва футболчилар, жамоалар, расмийлар ҳамда мухлислар хавфсизлигини таъминлаш масаласида қатъий позицияда экани таъкидланди.

Учрашувлар 2–3 март кунлари ўтказилиши режалаштирилган эди. Ҳозирча янги саналар ёки ўйинлар ўтказиладиган жойлар бўйича аниқлик киритилмади.