Нобоа «Рубин»нинг Барселонадаги ғалабасидан кейинги бонусларни айтди

2009 йил октябрида Қозоннинг «Рубин» клуби Чемпионлар лигасида катта шов-шув кўтарган эди: жамоа «Камп Ноу»да «Барселона»ни 2:1 ҳисобида мағлуб этганди. Ўша учрашувдан кейинги мукофот пуллари ҳақида собиқ ярим ҳимоячи Кристиан Нобоа эслаб ўтди. Бу ҳақда euro-football.ru хабар беради.

Нобоанинг сўзларига кўра, бу унинг фаолиятидаги энг йирик премияси бўлган. «Ҳар бир футболчи 80 минг доллардан олди», — дея унинг фикрини «Спорт-Экспресс» келтиради.

Футболчи ўша пулга ҳеч нарса харид қилмаганини, аксинча жамғариб қўйганини таъкидлади. Унинг айтишича, ўша пайтнинг ўзида ҳам анча мулоҳазали бўлган.

Эслатиб ўтамиз, 2009/2010 йилги Чемпионлар лигаси гуруҳ босқичида «Рубин» ўз квартетида учинчи ўринни эгаллаган. Гуруҳда «Барселона» ва «Интер» юқорироқда якунлаган бўлса, Киевнинг «Динамо»си сўнгги поғонада қолган.