«РБ Лейпциг» тажрибали дарвозабони Гулачисидан айрилди

Германиянинг «РБ Лейпциг» клуби камида бир ярим ойга асосий дарвозабони Петер Гулачисиз қолади. Бу ҳақда клуб матбуот хизмати маълум қилди. Бу ҳақда euro-football.ru хабар беради.

Венгриялик посбон яқинда «буқалар»нинг «Вольфсбург»га қарши уй учрашувида жароҳат олди ва биринчи бўлимдаёқ майдонни тарк этди.

Яхши томони, футболчига жарроҳлик амалиёти керак бўлмайди. Шифокорлар унинг чап тиззасидаги медиал коллатерал боғлам узилганини аниқлашди. Гулачи жорий мавсумда 22 та расмий ўйинда майдонга тушиб, 10 учрашувда дарвозасини дахлсиз сақлаб қолди.

Ҳозирда «РБ Лейпциг» Германия чемпионати турнир жадвалида 5-ўринда бормоқда, жамоа ҳисобида 40 очко бор.