Беллингем фаолиятидаги энг оғир армонини айтди

Мадриддаги «Реал» ярим ҳимоячиси Жуд Беллингем карерасида ҳануз унутолмаётган энг оғриқли омадсиз лаҳзаси ҳақида гапирди. Бу ҳақда euro-football.ru хабар беради.

Англиялик футболчи Дортмунднинг «Боруссия»си сафида ўйнаган пайтида Бундеслигада чемпионлик сўнгги турда қўлдан чиқиб кетганини эслади. «Майнц» устидан ғалаба «асаларилар»ни чемпион қиларди, бироқ учрашув 2:2 ҳисобида якунланиб, олтин медаллар яна «Бавария»га насиб этди.

«Ҳали ҳам ортимдан қувиб юрадиган омадсизликми? «Боруссия» билан мавсумнинг сўнгги кунида бой берилган чемпионлик. Эслатганингиз учун раҳмат», — Madrid Zone нашри футболчининг жавобини келтирди.

Беллингем 2023 йилнинг ёзида, Германиядаги ўша драматик якундан кўп ўтмай, Дортмунддан «Реал»га кўчиб ўтганди.