Англия ЖЧ олдидан Коста-Рика билан ўртоқлик ўйинини келишди

Англия терма жамоаси жаҳон чемпионати старти арафасида навбатдаги спарринг рақибини топди. The Mirror хабарига кўра, инглизлар ўртоқлик учрашувида Коста-Рика термасига қарши майдонга тушади. Бу ҳақда euro-football.ru хабар беради.

Беллашув 10 июн куни бўлиб ўтади. Аввалроқ Англия 6 июн куни Янги Зеландия билан ҳам ўртоқлик ўйини ўтказиши маълум қилинганди. Ҳар икки учрашув АҚШда, Флорида штатидаги машғулот базасига яқин ҳудудда ўтказилади, бироқ аниқ стадион ҳозирча тасдиқланмаган.

Англия ва Коста-Рика ҳозиргача икки марта тўқнаш келган. 2018 йилда ўртоқлик баҳсида Маркус Решфорд ва Денни Уелбек голлари эвазига инглизлар 2:0 ҳисобида зафар қучган, ундан тўрт йил олдин эса мундиал гуруҳ босқичида 0:0 натижа қайд этилганди.

17 июн куни Томас Тухел шогирдлари жаҳон чемпионатини Хорватияга қарши ўйин билан бошлайди. Ушбу гуруҳдан, шунингдек, Гана ва Панама ҳам ўрин олган.