Депутат оешмаларда эш көне дәвамында кыска физик күнегүләр ясауны кертергә тәкъдим итте

Дәүләт Думасында дәүләт оешмалары, предприятиеләр һәм оешмалар хезмәткәрләре өчен эш көне дәвамында кыска физик күнегүләр практикасы кертергә тәкъдим иттеләр. Бу инициативаны Думаның спорт буенча комитеты рәисе урынбасары Әмир Хәмитов белдерде, дип яза РИА Новости.

«Мин, Дәүләт Думасы депутаты буларак, предприятиеләрдә, дәүләт учреждениеләрендә һәм оешмаларда даими физкультминут практикасы кертү инициативасы белдердем», – дигән ул.

Әмир Хәмитов сүзләренчә, мондый физик активлык тәнәфесләре гади була һәм махсус җиһазлар яки эш урыннан бүленүне таләп итми. Аларны бөтен кеше дә эш урынында утырган килеш кенә башкара ала.

Аның сүзләренчә, әлеге тәкъдимне Сәламәтлек саклау һәм Хезмәт министрлыклары катнашында эш бирүчеләр өчен әзерләнгән киңәшләр ярдәмендә тормышка ашырып була. Шулай ук Россиянең берничә төбәгендә пилот проектлары тормышка ашыру мөмкинлеге дә карала.

«Мондый практика кайбер оешмаларда үзенең нәтиҗәлелеген күрсәтте инде: ул хезмәткәрләрнең хәлләрен яхшыртырга, стресс дәрәҗәсен киметергә, эшкә сәләтне арттырырга һәм һөнәри авыруларны кисәтергә булыша», – дигән Хәмитов.

Ул Россия халкының күбесенең аз хәрәкәтле тормыш рәвеше алып баруына игътибар юнәлтте. Озак вакыт утырып тору сәламәтлек белән бәйле җитди проблемалар китереп чыгара дип саный ул.

«Сәламәтлекне көндәлек кайгырту культурасын булдыру хезмәт саклау һәм авыруларны кисәтү өлкәсендә дәүләт сәясәтенең өстенлеге булырга тиеш дип саныйм», – дигән ул.