Курган өлкәсендә шәл бәйләүчеләр арасында бәйге узды

Урал аръягы фольклорчысы һәм этнографы Саверский истәлегенә багышланган «Наследие» фольклор фестивале кысаларында 26 апрельдә «Курган өлкәсе халык иҗаты йорты»нда «Авыл шәле» хатын-кызлар кәсебе конкурсы узды.

Бөтендөнья татар конгрессы матбугат хезмәте хәбәр итүенчә, фестивальнең максаты: Курган өлкәсе халыкларының мәдәни традицияләрен саклап калу һәм популярлаштыру. Хатын-кызларның кәсебенең тарихи мирасына — бәйләү сәнгатенә, аерым алганда, шәлгә аерым игътибар бирелә. Фестивальдә, шулай ук, декоратив иҗат һәм милли ризыклар белән танышырга була.

Курган өлкәсенең «Урал аръягы татарлары» татар мәдәнияте үзәге активистлар белән берлектә конкурста «милли колорит» категориясендә иске һәм заманча шәлләр күргәзмәсе, «Авыл кабартмасы», милли ризыклар күргәзмәсе белән катнашты.