2025 ел башында Татарстанда демографик вазгыять яхшырган

2025 елның гыйнварында Татарстанда халыкның табигый кимүе 1,2 мең кеше тәшкил итте, бу 2024 елның шул ук чоры белән чагыштырганда, 806 кешегә (яки 40 процентка) кимрәк. Бу мәгълүмат Татарстанстат хәбәрендә белдерелә.

Демографик күрсәткечләрнең яхшыруы туучылар санының артуы һәм үлүчеләр санының кимүе белән бәйле. Елның беренче аенда республикада 2,8 мең бала туган, бу узган елның гыйнварына караганда 9,1 процентка (яки 240ка) күбрәк. Үлүчеләр саны 13,1 процентка (565 кешегә) кимегән. Шулай ук теркәлгән никахлар саны арткан – 2024 елның гыйнварында 1 мең булса, хәзер - 1,2 мең, ә аерылышулар саны, киресенчә, 9,7 процентка кимегән һәм 951 очрак тәшкил иткән.

Шуңа да карамастан, 2024 ел нәтиҗәләре буенча Татарстанда халыкның табигый кимүе 9,7 мең кеше тәшкил итә – 2023 ел белән чагыштырганда, 53 процентка күбрәк (6,3 мең). Күрсәткечнең аеруча сизелерлек үсеше елның соңгы ике аенда туры килә – ноябрьдән декабрьгә кадәр үлем очрагы 9,2 меңнән 9,7 мең кешегә кадәр арткан.

Федераль дәрәҗәдә вазгыять шулай ук начарайган: Росстат мәгълүматларына караганда, 2024 елда Россиядә халыкның табигый кимүе 596,2 мең кешегә җиткән – бу үткән ел белән чагыштырганда 20,4 процентка күбрәк (495,2 мең).

Илдә үлүчеләр санының гомуми артуына карамастан, Татарстанда 2024 ел нәтиҗәләре буенча Идел буе федераль округында үлүчеләр санының иң түбән дәрәҗәсе теркәлгән – мең кешегә 11,3 очрак. Бу хакта ведомствоның йомгаклау коллегиясендә республика сәламәтлек саклау министры Марсель Миңнуллин хәбәр итте. Максатчан күрсәткеч - үлүчеләр санын мең кешегә 10,3 очракка кадәр киметү. 2023 елда бу күрсәткеч 10,7 тәшкил иткән.

Элегрәк Татарстан Рәисе Рөстәм Миңнеханов киңәшмәләр барышында төбәктәге демографик вазгыятьтән канәгать булмавын билгеләп үтте. Аның сүзләренчә, бүген кешеләр шәхси мәнфәгатьләрен гаилә төзүгә караганда өстен куя, һәм балалар шактый соңрак туа. Татарстанстат мәгълүматларына караганда, республикада беренче баласын тапкан хатын-кызларга уртача 29 яшь.