Дәүләт Думасы Россия халкын кибермошенниклардан саклау өчен закон кабул итте

Дәүләт Думасы Россия халкын телефон һәм интернет мошенникларыннан саклау өчен закон кабул итте.

Яңа закон «Антифрод» дәүләт мәгълүмат системасы нигезендә мошенникларның тавышлары базасын булдыруны, телефон экраннарында шалтыратуларны мәҗбүри маркировкалауны, реклама шалтыратуларыннан һәм смс-хәбәрләреннән баш тарту мөмкинлеген, шулай ук дәүләт органнарына һәм банкларга чит ил мессенджерлары аша кешеләр белән элемтәгә чыгуны тыюны күздә тота.

Моннан тыш, элемтә хезмәтләреннән файдаланучылар өчен шәхси катнашудан башка сим-карта рәсмиләштерүне тыю мөмкинлеге булдырыла.

Хәзер банклар антифрод-чараларны онлайн-түләүләргә генә түгел, ә банкоматларга карата да кулланырга тиеш булачак. Моннан тыш, Россия халкы ышанычлы затлар билгели алачак һәм банк аларга барлык операцияләрне раслау өчен мөрәҗәгать итәчәк.

Шулай ук, элегрәк мошенниклык схемаларына эләккән һәм Россия Үзәк банкының кара исемлекләренә эләккән счетлардан аена 100 мең сум күләмендә акча алу өчен чикләүләр кертелә.