«Мәскәү – Татарстан күпере» яшьләр форумы 12 апрельдә була

Х «Мәскәү – Татарстан күпере» Мәскәү яшьләр форумы Россия башкаласында 12 апрельдә узачак. Бу хакта Татарстан Республикасының Россия Федерациясендәге Тулы вәкаләтле вәкиллеге матбугат хезмәте хәбәр итә.

Бу төрле өлкәләрдәге уңышлы спикерлар, шәхси тәҗрибәсенә таянып, яшьләргә һөнәр сайлау һәм максатларны тормышка ашыру турында киңәшләр бирә торган уникаль мәйданчык, дип ассызыкладылар вәкиллектә.

«Безнең Татарстанда бик күп төрле чаралар уза, әмма бу форум үзенчәлекле атмосферасы белән аерылып тора. Мондый формада аралашуыбыз бик мөһим», - дип билгеләп үткән иде элегрәк ТР Рәисе Рөстәм Миңнеханов.

Республика җитәкчесе моңарчы тугыз форумда катнашты. «Аны нәкъ бер айдан юбилей очрашуында да көтәбез», – дип билгеләделәр матбугат хезмәтендә.

Форум инде икенче тапкыр РФ Хөкүмәте каршындагы Финанс университетының «Нобель залы»нда узачак. Ул 14:30 сәгатьтә башлана.

«Мәскәү һәм Мәскәү өлкәсе яшьләрен катнашырга чакырабыз», - диделәр Татарстан Республикасының Россия Федерациясендәге Тулы вәкаләтле вәкиллегендә.