Рособрнадзор мигрантларның балалары өчен рус теленнән минималь баллар чиген билгеләде

Мәктәпкә кергәндә рус теленнән тестны уңышлы тапшыру өчен мигрантларның балаларына максималь баллар санының кимендә 30 процентын җыярга кирәк булачак. Мәгариф һәм фән өлкәсендә күзәтчелек буенча федераль хезмәтнең (Рособрнадзор) боерыгы проекты норматив хокукый актлар проектлары порталында урнаштырылган.

Сүз башлангыч гомуми, төп гомуми һәм урта гомуми белем бирү программаларына укырга кабул итү турында бара, дип билгеләп үтелә документта.

Боерык 2025 елның 1 апреленнән үз көченә керергә тиеш. Шул ук көннән мигрантларның балаларын рус теленнән тест тапшырмыйча Россия мәктәпләренә кабул итүне тыючы новелла эшли башлый. Законны РФ Президенты Владимир Путин 2024 ел азагында имзалады.