Татарстанда технология укытучысы укучы белән сугышкан өчен суд алдында җавап тотачак

Чистай районындагы бер мәктәпнең укытучысы балигъ булмаган баланы тәрбияләү бурычын тиешенчә үтәмәүдә гаепләнү сәбәпле суд алдында җавап тотачак. Бу хакта Россия Тикшерү комитетының ТР буенча тикшерү идарәсе җитәкчесенең өлкән ярдәмчесе Андрей Шептицкий хәбәр итә.

Тикшерүчеләр фикеренчә, узган елның 12 декабрендә технология укытучысы белән 7нче сыйныф укучысы арасында низаг килеп чыккан. Сәбәбе – укучы тәртип бозу. Бер мизгелдә укытучы укучыга карата физик көч кулланган.

Шуннан соң укучы өлкән иптәшенә – 11нче сыйныф укучысына зарланган. Ул исә укытучы янына барган, ризасызлык белдергән. Өлкән сыйныф укучысы белән укытучы сугышып киткән. Низаг вакытында укытучы берничә тапкыр укучыга сукмакчы булган һәм аны аяктан еккан.

Расланган гаепләү белән җинаять эше карау өчен судка юлланган.