Песошин Биоресурслар буенча Татарстан дәүләт комитетының йомгаклау утырышында катнашты

Татарстан Премьер-министры Алексей Песошин Биологик ресурслар буенча Татарстан Республикасы дәүләт комитетының йомгаклау тулы вәкиллекле утырышында катнашты. Бу турыда Татарстан Рәисе матбугат хезмәте хәбәр итте.

Алексей Песошин билгеләп үткәнчә, күзәтчелек эшчәнлеге хайваннар дөньясы объектларын һәм аларның яшәү тирәлеген саклауны тәэмин итүдә төп корал булып кала.

Биоресурслар буенча дәүләт комитетының системалы эше хокук бозуларны ачыклау һәм булдырмау буенча уңай нәтиҗә бирә. 1 сентябрьдән «Аучылык һәм аучылык ресурсларын саклау турында» Федераль законга үзгәрешләр үз көченә керә. Бу ау билетын алу процедурасын контрольдә тотуны көчәйтергә мөмкинлек бирәчәк.

«Комитетка аучылык билетларын алуга кандидатларның аучылык минимумы белемнәрен тикшерү буенча чаралар комплексын эшләргә, максималь җаваплылык тәэмин итәргә һәм тиешле әзерлексез затларның билетлар алу мөмкинлеген булдырмаска кирәк. Корал белән куркынычсыз эш итү күнекмәләренә аерым игътибар бирергә», - диде ТР Премьер-министры.

Ул Зәңгәр күлләр экосистемасына антропоген йөкләнешне киметү мөһимлегенә игътибар итте. «ТР шәһәрләрен үстерү институты» фондына туристлар агымын контрольдә тоту мөмкинлеге белән Зәңгәр күлләр территориясенә керү төркемнәрен эшләү һәм билгеләү буенча эшләрне төгәлләргә кирәк. Бүген сулыкларда браконьерлык очраклары дәвам итә, дип ассызыклады Хөкүмәт башлыгы.

Алексей Песошин Балыкчылык буенча федераль агентлык коллегаларын су объектларында контрольне көчәйтергә чакырды.

«2024 елда суда күзәтчелек эшчәнлеген көчәйтә торган кайбер үзгәрешләр кертелүен истә тотарга кирәк. Быел март аеннан даими рейдлар кысаларында балыкчылык өлкәсендә дәүләт контролен гамәлгә ашыру мөмкинлеге булачак», - дип билгеләп үтте ТР Премьер-министры.

Агымдагы елда территориаль аучылык корылышының гамәлдә булу вакыты тәмамлана. Алексей Песошин билгеләп үткәнчә, республика алдында киләсе 10 еллык чорга яңа документ эшләү бурычы тора. Ул аучылык тармагының агымдагы торышын чагылдырырга һәм төбәкнең табигый һәм технологик үзенчәлекләрен исәпкә алып, аның үсеш векторын билгеләргә тиеш. Быел бу максатларга республика бюджетыннан 9,4 млн сум бүлеп бирелгән.

«Шуңа бәйле рәвештә Комитеттан, Республика Фәннәр академиясе белән берлектә, территориаль аучылык корылышы буенча документ әзерләүне төгәлләвен һәм аны, аучылык хуҗалыгы тармагын якын киләчәктә үстерүгә юнәлеш буларак, аучыларга җиткерүен сорыйм», - диде Татарстан Республикасы Хөкүмәте башлыгы.

Быел Бөек Җиңүнең 80 еллыгы билгеләп үтелә, дип өстәде ул. Шулай ук 2025 ел илебездә һәм республикабызда Ватанны саклаучылар елы дип игълан ителде.

«Эшкә җәлеп ителгән барлык министрлыклар һәм ведомстволардан, муниципаль районнар һәм шәһәр округлары башлыкларыннан тиешле чараларны үткәрү эшен оештыруларын сорыйм. Комитет хезмәткәрләренә МХОгә гражданнар коралын, сугыш кирәк-яракларын һәм балык тоту ятьмәләрен тапшыруда көчләреннән килгәнчә ярдәм иткәннәре өчен рәхмәт белдерәм. Шулай ук ветераннарга һәм махсус хәрби операциядә катнашучыларга һәм аларның гаиләләренә ярдәм итү мөһим», - дип өстәде ТР Премьер-министры.

Аннары комитетның аеруча зур уңышларга ирешкән хезмәткәрләрен дәүләт һәм ведомство бүләкләре белән бүләкләү тантанасы булды.