Диния нәзарәте күчмә мәчет итеп ясалачак автомобиль өчен 2 млн сумнан артык акча җыйган

Бүген, ТР мөселманнары Диния нәзарәтенең «Каһарман» хәйрия акциясенең өченче көнендә УАЗ автомобилен һәм аннан күчмә мәчет ясау өчен җиһазлар сатып алуга 2 176 987 сум акча җыелды. Акциягә Татарстанның барлык почмакларыннан һәм аннан читтә яшәүче мөселманнар кушылды һәм, мөмкинлегенә карап, 10, 20, 30 меңнән алып 1 миллион сумга кадәр акча күчерде. Бу хакта ТР Диния нәзарәте матбугат хезмәте хәбәр итә.

Акциянең нәтиҗәсе буларак, 1 473 000 сумлык УАЗ («буханка») йөк-пассажир автомобиле сатып алынды. Автомобиль юлсыз маршрутларга җайлашу һәм «бәя-сыйфат» кебек күрсәткечләрне исәпкә алып сайланды. Аны ТР мөселманнары Диния нәзарәтенә алып килү белән, идәненә җылыткыч материал һәм ковролин җәеләчәк, кондиционер урнаштырылачак, китаплар өчен киштәләр эленәчәк, шулай ук миһраб куелачак һәм каллиграфик язулар белән бизәләчәк.

Күчмә мәчет хәрби-кыр шартларында махсус хәрби операциядәге мөселман сугышчылары өчен кирәк. Тәгәрмәчле мәчет махсус хәрби операциядә солдатларга намаз укуда һәм дога кылуда ярдәм күрсәтәчәк.

«Каһарман» хәйрия акциясе Татарстан мөселманнары Диния нәзарәтеннән махсус хәрби операциядәге сугышчыларга чираттагы ярдәм чарасы булып тора. Һичшиксез, акциядә катнашучылар күчмә мәчеттә укылган һәр намаз өчен әҗер-савапка ирешәчәк, диелә хәбәрдә.