Путин «Автоваз» заводында булды һәм берничә Lada машинасын бәяләде

Россия Президенты Владимир Путин «Автоваз» заводында булды. Исегезгә төшерик, предприятие Тольяттида (Самара өлкәсе) урнашкан.

Президент Россия автотехника базарындагы яңа модель – Lada Iskra автомобилен карады. Путинга машинаның төрле кузовларын һәм өч төсен (кызыл, ак һәм зәңгәр) күрсәттеләр. Дәүләт башлыгы кызыл төстәге седанның ишеген ачты һәм салонны карады, ләкин машинага утырып карамады.

Шул ук вакытта ул Lada Aura автомобилен бәяләде, машинаның идарә ителешен һәм күренүчәнлек сыйфатын мактады.

«Миңа бик ошады. Артка чигәсең – камера эшли. Күренүчәнлек, идарә ителеш әйбәт. Шәп», – дип билгеләде Путин «Автоваз» хезмәткәрләре белән аралашканда. Исегезгә төшерик, 2024 елның 16 июлендә Россия лидеры Тверьдә кара Lada Aura машинасына тест-драйв уздырды. Сүз уңаеннан, шул ук машинаны Татарстан Рәисе Рөстәм Миңнеханов та сынап карады.

Путин РФ субъектына эш сәфәре вакытында шулай ук Самара өлкәсе губернаторы Вячеслав Федорищев белән очрашыр, дип көтелә.