Россиядә авиабилетларга югары бәя чиген билгеләргә планлаштыралар

Россиянең барлык авиакомпанияләре 2025 елның сентябренә аларның бәя сәясәтен нигезли торган эчке документлар әзерләргә тиеш. Бу хакта Федерация Советында түгәрәк өстәлдә Россия Транспорт министрлыгының гражданлык авиациясе өлкәсендә Дәүләт сәясәте департаменты директоры Вероника Ходырева белдерде. «Известия» газетасы шул хакта хәбәр итә.

Авиаташу хезмәтен тәкъдим итә торган компаниянең тариф сәясәтен нигезли торган документы булмавы профильле министрлык боерыгын бозу буларак каралачак.

Монополиягә каршы федераль хезмәт һәм Транспорт министрлыгы авиакомпанияләргә пассажирларны ташый торган компанияләрнең коммерция сәясәтенең төп нигезләмәләрен формалаштыру буенча тәкъдимнәр белән хат юллаган инде, дип сөйләгәннәр басмага Россия Монополиягә каршы федераль хезмәттә.

Аерым алганда, «Аэрофлот» һәм «Сибирь» авиакомпаниясе белдергәнчә, икътисади нигезләнгән тарифтан арзан авиабилетлар сату өлеше кимендә 60 процент тәшкил итәчәк, ә максималь тариф буенча сатыла торган билетлар өлеше 2,5 проценттан кимрәк була. Шулай ук ике авиакомпания дә аерым категория гражданнар өчен «инициативалы ташламалы программалар» тәкъдим итә.

Хәзер Монополиягә каршы федераль хезмәт, гомумән алганда, 15 авиакомпаниянең коммерция сәясәтен өйрәнә. Транспортта стратегик эшләнмәләр үзәгендә яңалык киләчәктә Монополиягә каршы федераль хезмәт объектив контроль алып барсын өчен инструмент булачак, дип фаразлыйлар.

Шуның белән басма тарафыннан сораштырылган экспертлар артык чикләүләр инфраструктураны үстерүгә һәм самолетларның техник торышын контрольдә тотуны тәэмин итүгә инвестицияләр агымын киметергә мөмкин булуына игътибар итте. Шуңа күрә, алар фикеренчә, карарлар баланслы булырга тиеш.