Махсус операция геройларына һәйкәл өчен иң яхшы эскизга конкурс игълан ителде

«Ватанны саклаучылар» фонды һәм Мәскәү финанс-юридик университеты махсус хәрби операция геройларына багышланган һәйкәл өчен эскизлар бөтенроссия конкурсын башлап җибәрде.

Бәйге Федераль казначылык, РФ Фән һәм югары белем министрлыгы, РФ Мәгариф министрлыгы һәм Финанс мониторингы федераль хезмәте белән берлектә уздырыла, дип билгеләп үтә оештыручылар.

Профессиональ скульптор һәм архитекторлардан тыш, конкурста теләге булган кешеләр, шул исәптән махсус операция ветераннары үзләре һәм аларның якыннары да катнаша ала.

Гаризаны 28 февральгә кадәр roskazna.gov.ru/konkurs_eskizov/ адресы аша кереп Федераль казначылык сайтында тутырырга була. Шунда ук конкурсның шартлары турында тулырак белергә мөмкин.

Җиңүче һәм дипломантларны комиссия билгеләячәк. Аның составында монументаль һәм рәсем сәнгате өлкәсендәге һөнәри берлекләр вәкилләре, шулай ук конкурсны оештыручылар булачак. Чарага быел март аенда йомгак ясалырга тиеш.