Зәй районы Кадер мәктәбендә һәлак булган хәрбиләр истәлегенә хәтер стенды булдырылды

Зәй районы Кадер авылы мәктәбендә әлеге уку йортында белем алган, махсус операция зонасында хәрби бурычын үтәгәндә һәлак булган Демьян Барсуков һәм Юрий Жаровка багышланган хәтер стенды ясалды. Бу хакта «Зәй яңалыклары» сайтында хәбәр ителә.

Атналык линейкада укучыларга әлеге батыр хәрбиләрнең тормыш юллары турында мәгълүмат бирелде.

Демьян Михайлович Барсуков 1988 елның 15 ноябрендә Әхмәт авылында туган. Кадер урта мәктәбен тәмамлаган егет Түбән Каманың 53нче училищесында һөнәр үзләштерә. 2006 елда армия сафларына алына. Хәрби хезмәтне Свердловск өлкәсенең Лесной шәһәрендә үтә. 2022 елда мобилизация буенча махсус хәрби операциягә китә. Демьян Михайлович разведчик булып хезмәт итә. 2023 елның ноябрь аенда, яраланып, Мурманск госпиталендә дәвалана. Тернәкләнгәч, хезмәтен дәвам итә. 2024 елның 4 апрелендә биргән антына тугры калып, батырларча һәлак була.

Демьян Барсуков, һәлак булганнан соң, Россия Президенты Владимир Путин карары белән махсус хәрби операция барышында күрсәткән батырлыгы өчен дәүләт бүләге — Батырлык ордены белән бүләкләнде.

Юрий Жаров 1994 елның 1 декабрендә Урта Пәнәче авылында күп балалы гаиләдә туа. Югары Пәнәче мәктәбендә укыганда ук спорт белән шөгыльләнеп, нык бәдәнле, көчле, ярдәмчел егет булып үсә. Аның ирекле көрәш, штанга күтәрү буенча уңышлары шактый: өч тапкыр Татарстан чемпионы була.

Юрийга Гадәттән тыш хәлләр министрлыгында хезмәт куйганда күп тапкырлар кешеләрне коткарырга туры килгән. Курку белмәс, ватанпәрвәрлек кебек сыйфатлары көчле бәдәнле егетне Ватан сагына басарга этәргән дә. Махсус хәрби операция башлану белән ул контракт төзеп, илебез сагына баса. Десант-штурм гаскәрләрендә хезмәтен намус белән батырларча үти. 2023 елның октябрендә Россия Оборона министрлыгы белән кабат килешү төзеп, яңадан илебез чикләрен сакларга китә.

Юрий Анатольевич масхус хәрби операциядә күрсәткән каһарманлыгы һәм фидакарьлеге өчен «Батырлык өчен» медале, III дәрәҗә Хәрби батырлык өчен ордены белән бүләкләнгән.

Ул 2024 елның 5 июлендә махсус хәрби операция зонасында хәрби бурычын үтәгәндә батырларча һәлак булды. Ефрейтор Юрий Жаров хәрби бурычын үтәгәндә күрсәткән батырлыгы һәм фидакарьлеге өчен Россия Президенты Указы нигезендә Батырлык ордены белән (һәлак булганнан соң) бүләкләнде.