Казан укучылары Мәскәүнең Татар мәдәнияте үзәгендә булды

Казанның 4нче интернат-гимназиясе укучылары әлеге уку йортының Әтиләр советы әгъзасы Марат Әхмәдишин җитәкчелегендә Россия башкаласы буйлап экскурсия туры кысаларында Татар мәдәнияте үзәгенең тарихи бинасында булды. Бу хакта Мәскәү шәһәр татар милли-мәдәни автономиясе төбәк иҗтимагый оешмасының матбугат хезмәте хәбәр итә.

Татар мәдәнияте үзәге директоры Әнвәр Хөсәенов аларга Кече Татар тыкрыгындагы 8нче йорт белән аерылгысыз бәйләнгән Мәскәүнең татар җәмгыяте тарихы турында сөйләде.

Ул үзәкнең бүлмәләрен, залларын һәм дәресләр үткәрелә торган сыйныфларны күрсәтте, Татар мәдәнияте үзәге эшчәнлеге белән таныштырды һәм бинаның тарихи күренешен, Мәскәүдә яшәүче татарларның телен, гореф-гадәтләрен һәм милли үзенчәлеген саклау буенча Мәскәү татарлары автономиясе куйган тырышлык хакында сөйләде.