Пенсионерлар индексация өчен гыйнвар пенсиясенә өстәмә түләү алачак

Россиянең барлык 39 миллион пенсионеры да февральдә түләү белән факттагы инфляция дәрәҗәсенә индексация өчен өстәмә түләү алачак. Бу турыда Россия хезмәт һәм социаль яклау министры Антон Котяков хәбәр итә. РИА Новости шул хакта яза.

«Социаль фонд пенсия күләмен саный инде. Арттырылган түләүләр барлык 39 миллион пенсионерга февральдә киләчәк. Һәм шул вакытта ук гыйнвар аена өстәмә түләү күчереләчәк», - диде Котяков РФ Президентының Министрлар Кабинеты белән киңәшмәсендә.

Ул билгеләп үткәнчә, акча гражданнарга гадәти график буенча айның 3-25 көннәренә кадәр биреләчәк. Моның өчен кирәкле документлар әзерләнде һәм Хөкүмәткә кертелде, дип ачыклык кертте министр.

Росстат мәгълүматларына караганда, 2024 ел нәтиҗәләре буенча Россиядә инфляция 9,5 процент тәшкил иткән. Шул ук вакытта 1 гыйнвардан иминият пенсияләре инфляциянең фаразланган дәрәҗәсенә 7,3 процентка арттырылды. РФ Президенты Владимир Путин кушуы буенча илдә пенсияләр өстәмә рәвештә факттагы инфляция дәрәҗәсенә кадәр арттырылачак.