Татарстанның атказанган архитекторы Александр Дембич 74 яшендә вафат булган

Татарстанның атказанган архитекторы, «Артпроект» архитектура бюросы директоры Александр Дембич 74 яшендә вафат булган. Аның үлемен «Шәһәрләр мирасы» телеграм-каналында Татарстан Рәисе ярдәмчесе Олеся Балтусова хәбәр итте.

«Иң яхшы, акыллы, кешегә дә шәһәргә дә игътибарлы... Шушы көннәрдә очрашырга һәм оппонентларга диссертация җибәрергә тиеш идек. Әле генә сөйләштек... Ничек шулай була ала? Аның 75 яшьлегенә Россиянең атказанган архитекторы исемен әзерли идек. Әле күпне планлаштырган идек бит», – диелә хәбәрдә.

Постта Дембичның зур кеше һәм масштаблы шәхес булуы да әйтелә. Ул «шәһәр төзүчесе» профстандартын язган, Чаллының генераль планын раслауга илтеп җиткергән.

«Шулкадәр күп нәрсә проектлады! Беркайчан бирешмәде. Ул бик ялгыз иде һәм үзе турында һәрвакыт бәхетле дип әйтте. Үзеннән ерак яшәгән гаиләсен бик яратты. Һәм безне, укучыларын яратты», – диелә «Шәһәрләр мирасы» телеграм-каналында.

1985 елда Александр Дембич КИСИның (КГАСУ) архитектура факультеты деканы булып эшли. 1990 елдан үз инициативасы белән ачылган «Шәһәр төзелеше һәм авыл җирлекләре планировкасы» факультетын җитәкли. Татарстанның атказанган архитекторы һәм КГАСУ профессоры Казан шәһәр төзелеше үсеше концепциясен әзерләүчеләрнең берсе була.