Синоптик бу атнада Татарстанда температура кискен үзгәрү сәбәпләрен аңлатты

Бу атнада Татарстанда башта аномаль җылы, аннан аномаль салкын һәм кабат аномаль җылы була. Температураларның сизелерлек уйнавының сәбәпләрен «Татар-информ»га республиканың Гидрометеорология үзәге җитәкчесе Феликс Гоголь сөйләде.

«Узган ялларда һәм бу атна башында республикада һава торышы көнбатыштан килгән циклон йогынтысында булды һәм безгә шактый җылы һава массалары алып килде. Шуңа күрә температура фоны күпьеллык күрсәткечләрдән шактый югары, аерым алганда, ял көннәрендә 5-8 градуска югары булды», – диде ул.

Чәршәмбе һәм пәнҗешәмбе көннәрендә республикада һава температурасының сизелерлек төшүе көтелә.

«Бу безнең территориягә төньяк киңлекләреннән һава керү белән аңлатыла. Бүген көндез һәм төнлә без циклонның тыл өлешендә, ә иртәгә төньяк антициклон зонасында булабыз. Безгә тәэсир итәчәк югары басым өлкәсе бик салкын һава алып килә», – дип кисәтте Гоголь.

Чәршәмбе көнне, 22 гыйнварда, Татарстанда төнлә һәм иртән һава температурасы -16..-21 градус, ә аязганда -24 градус була. Секундына 16-21 метр тизлектә көчле җил булуы ихтимал, юлларда бозлавык була.

Иң суыгы 23 гыйнварда булачак. Төнлә һава температурасы -18...-23 градус була, көнчыгыш районнарда аязганда -28 градуска кадәр төшәчәк. Көндез -9..-14 градус булыр дип көтелә. Юлларда бозлавык саклана.

«Чәршәмбе һәм пәнҗешәмбе көннәрендә республикада уртача температура нормадан 3-4 градуска түбән булачак. Хәзер ул норма буенча -10..-11 градус булырга тиеш», – диде Феликс Гоголь.

Җомга көнне, 24 гыйнварда, салкыннар әкренләп сүреләчәк, әмма көчле җил булуы ихтимал, төнлә җил тизлеге секундына 15-18 метрга кадәр җитәргә мөмкин. Төнлә һава температурасы -10..-15, ә көндез -8..-13 градус була.

«Атна ахырында температура әкренләп артачак. 24-25 гыйнварда республика буенча бераз кар явачак, көндез һава температурасы 7-12 градус салкын була. Россия Гидрометеорология үзәгенең якынча фаразлары буенча, якшәмбе көнне температура күтәреләчәк», – диде Гоголь.

Россия Гидрометеорология үзәгенең якынча фаразлары буенча, 26-27 гыйнварда көндез Казанда кабат ноль градуска кадәр җылытачак.