Россия Мәгариф академиясе мәктәпләрдә интеграль билге кертүне хуплады

Мәктәпләрдә интеграль билге кертү – акыллы тәкъдим, чөнки баланың барлык казанышларын һәм сәләтләрен комплекста карарга кирәк. Бу хакта Россия Мәгариф академиясе президенты Ольга Васильева белдерде, дип хәбәр итә ТАСС.

«Бу акыллы идея. Минем күп тапкырлар кабатлаганым булды: мәктәптә укуның нәтиҗәсе – ул бала БДИда сайлаган фәннәрдән генә түгел, ә барлык фәннәрдән ирешкән нәтиҗә», - дип ассызыклады Россия Мәгариф академиясе башлыгы.

«Чыгарылыш сыйныф укучысының барлык казанышларын, сәләтләрен һәм талантларын комплекста исәпкә алырлык механизм кирәк. БДИ моны әлегә тулысынча тәэмин итә алмый», - дип аңлатты ул.

Васильева фикеренчә, балаларга индивидуаль карау кирәк, әмма моның өчен җәмгыять балаларның уңышларына бәя бирүче мәктәпкә һәм укытучыларга ныграк ышанырга тиеш.

Элегрәк Кеше хокуклары советы башлыгы Валерий Фадеев мәктәп тәмамлаучы укучыларга фәннәрнең бөтен спектры буенча белемнәрне исәпкә ала торган интеграль билге кертергә тәкъдим итте. Әлеге билге, БДИ нәтиҗәләре белән беррәттән, югары уку йортына кергәндә исәпкә алынырга тиеш, дип саный ул.

Моңа бәйле рәвештә, РФ вице-премьеры Дмитрий Чернышенко 2036 елга кадәрге чорга һәм 2040 елга кадәр перспектива белән мәгарифне үстерү стратегиясен әзерләү кысаларында интеграль билге кертү мөмкинлеге турында фикер алышу булачагын билгеләп үтте.