Уфада «Нур» татар театры өчен хәйрия аукционы булды

Уфада Мәрьям Солтанова-Акчурина исемендәге дискуссия клубында Яңа ел алды хәйрия аукционы узды. Аукционда Вәкил Шәйхетдинов картиналары, китаплар, эретелгән май һәм бал сатылды. Бу хакта «Миллиард. Татар» хәбәр итә.

Сатудан кергән акчалар Уфа «Нур» дәүләт татар театры балалар студиясенә тапшырыла. Биредә балалар актерлык осталыгы белән шөгыльләнә һәм татар мәдәниятен үстерүгә бәяләп бетергесез өлеш кертә.

Мондый форматтагы хәйрия кичен уздырып, дискуссия клубында катнашучылар Мәрьям Солтанова-Акчуринаның күркәм традициясен саклады.

«Татар хәйриячелеге тарихында мәгърифәтчелек проектларына иганәчелек ярдәме күрсәтү тәҗрибәсе бар. Без дискуссия клубыбыз исемен йөрткән кешенең юлыннан барырга булдык. Архив документларыннан билгеле булганча, Мәрьям Солтанова-Акчурина XX гасыр башында татар кызлары өчен приют-мәктәп ачкан, кызлар биредә аның хисабына яшәгән.

Ул бик аз санлы меценатларның берсе һәм Уфа мөселман хатын-кызлар җәмгыяте рәисе булган. Әлеге җәмгыять өлкән яшьтәге ир-атлар һәм мөселман малайлар өчен приютка матди ярдәм күрсәткән», - дип сөйләде дискуссия клубы рәисе Нәфисә Акчурина.