Яңа ел бүләге: Түбән Камадан хәрбигә шәхси составны йөртү өчен УАЗ машинасы тапшырдылар

Түбән Кама ТЭЦ-1 җылылык-электр станциясе махсус хәрби операция зонасына җибәрү өчен ике дизель генераторы сатып алган һәм мичләр әзерләгән. Гуманитар йөкне шулай ук Казан инновацион университеты һәм 34 номерлы гимназия-интернат студентлары, укучылары һәм укытучылары җыйган.

Старковлар гаиләсе дә зур бүләк әзерләгән – УАЗ автомобиле. «Гуманитарка. Татарстан» төркеме волонтерлары машинаны ремонтлаган һәм хәрби хезмәткәргә тапшырган. Хәрби инде машинада алгы сызыкка юл тоткан.

«Безнең коллектив хәрбиләребезне тәэмин итү эшендә ярдәм күрсәтә. Коллектив җыйган акчаларга генераторлар, мичләр, башка әйберләр сатып алдык, егетләребезгә уңайлы булсын өчен», - дип сөйләде ТЭЦ-1 директоры Сергей Олюнин.

«Гуманитарка. Татарстан» төркеме администраторлары битараф булмаган шәһәр халкына бик рәхмәтле. Тылдагы армия көннән-көн арта. Уртак тырышлык нәтиҗәсендә егетләр фронтта нәрсәгә дә булса мохтаҗлык тоймый.

«Без даими нигездә хәрбиләр белән турыдан-туры элемтәдә торабыз. Сөйләшкәндә егетләр нәрсәдер сорый. Кирәкле әйберләрне китергәч, без аларны махсус операция зонасына җибәрәбез. Бу әйберләрнең анда кирәкле, файдалы булачагын беләбез. Егетләрдән дә иң уңай җавап килә. Хәрби егетләребез бездән башка күпкә кыенрак булыр иде, диләр», - дип сөйләде «Гуманитарка. Татарстан» төркеме администраторы Татьяна Никифорова.

Старковлар сатып алган машинаны волонтерлар махсус Яңа елга дип әзерләгән. Машинаны алырга дип Череп позывнойы хәрби фронттан кайткан. Автомобильне ай ярым ремонтлаганнар.

«Автомобиль тулысынча техосмотр узды, бөтен кирәк нәрсәләре алыштырылды. Кузовны тулысынча ремонтладык, хаки төсенә буядык һәм, әлбәттә, хәрбинең позывное кебек «череп» рәсеме төшердек. Шундый традиция, дип әйтергә була», - дип билгеләде «Гуманитарка. Татарстан» төркеме администраторы Сурен Авдоян.

Махсус операция хәрбиләре өчен бик кирәкле бүләкне Старковлар гаиләсе сатып алган. Андрей белән Елена УАЗны ишегалдында күреп алган. Ир белән хатын шундук бергәләп карар кабул иткән. УАЗның элеккеге хуҗасы машинада балыкка йөри торган булган. Ләкин сатып алуның максаты турында белгәч, шунда ук ризалашкан.

«Махсус операциядәге егетләргә автомобиль кирәк булу турында белдек, уйлаштык, сатып алдык. Килешеп тә түгел, мин инде күптән шундый идея турында уйлап йөрдем, ә ул үзе аерым уйлап йөргән. Машинаны карадык, бәясен сөйләштек, сатып алдык, тапшырдык. Кирәк булыр, кемнедер коткарыр, дип өметләнәбез», - ди Андрей һәм Елена Старковлар.

Череп позывнойы хәрби, үз чиратында, «Гуманитарка. Татарстан» төркеме администраторларына рәхмәт белдергән һәм командование исеменнән рәхмәт хатлары тапшырган. Старковлар гаиләсенә дә рәхмәт сүзләре җиткерелгән.

«Бу машина шәхси составны йөртү, азык-төлек продуктлары һәм хәрби кирәк-яраклар ташу өчен бик кирәк. Автомобиль бик яхшы, ул төрле җирдән үтә ала. УАЗ машинасы – алыштыргысыз әйбер. Кулланачакбыз, булдыра алганча сакларга тырышачакбыз», - ди Череп позывнойы хәрби хезмәткәр.

Әлеге автомобиль сатып алынган, ремонтланган һәм махсус хәрби операция зонасына тапшырылган 34нче автомобиль булды. Череп позывнойы хәрби, машинага гуманитар йөк төяп, фронтка хезмәттәшләре янына киткән. Мондый Яңа ел бүләгенә алар хәзер бик шат булачак.

«Барыгызга да зур рәхмәт әйтергә телим. Җиңү безнең кулда булачак. Якынлашып килүче Яңа ел белән», — дип рәхмәт белдерде хәрби.

Элегрәк ТР Рәисе Рөстәм Миңнеханов Татарстан Дәүләт Советына еллык юлламасында махсус хәрби операциядә катнашучыларга ярдәм күрсәтүгә мөһим өлеш керткән өчен волонтерларга рәхмәт белдерде.

«Кешеләр моны үз тирәсендә шундый ук битараф булмаган гражданнарны берләштереп, фикердәшләрдән тулы бер командалар җыеп ихлас күңелдән һәм чын йөрәктән эшли», - дип искәртте республика җитәкчесе.

2 сентябрьдән Татарстанда РФ Саклану министрлыгы белән контракт төзүчеләргә 2 миллион сумга кадәр акча бирелә. Акчаның күләме арту республикада түләүләр арттырылуга бәйле.

РФ Кораллы көчләре сафларында контракт буенча хезмәт итү, шулай ук премияләр, ташламалар һәм түләүләр турында heroes-tatarstan.ru сайтында яки 117 телефоны буенча белергә була. Шулай ук Контракт буенча хәрби хезмәткә сайлап алу пунктына (1нче разряд) мөрәҗәгать итәргә мөмкин. Адресы: Казан, Аэропорт урамы, 1/40; телефоны: 8 (843) 221 44 52. Моннан тыш, 8 (800) 222 59 00 номеры буенча мөрәҗәгать итәргә була.

Материал Надежда Баһаветдинова катнашында әзерләнде.