Казанда трамвайда һәм троллейбуста йөрү өчен геолокация буенча түләп була

Татарстан башкаласының трамвай һәм троллейбусларында юл йөрү өчен түләү геолокация буенча мөмкинлеге барлыкка килде. Түләү банк картасы бәйләнгән «Казан транспорт» кушымтасында башкарыла. Бу хакта «Метроэлектротранс» МУП матбугат хезмәте Телеграм-каналында хәбәр ителә.

«Түләү технологиясе транспорт чаралары һәм пассажир смартфоны геопозициясен чагыштыруга нигезләнгән», — дип аңлаттылар предприятие матбугат хезмәтендә.

Юл йөрү бәясен түләү өчен «Казан транспорт» кушымтасын йөкләтергә, банк картасын бәйләргә, Bluetooth һәм геолокацияне кабызырга һәм үз маршрутыңны (кушымта аны автомат рәвештә билгеләячәк), түләүне расларга, контролерга электрон билетны күрсәтергә кирәк.

Җир өсте электр транспортында шулай ук QR-кодлы мәгълүмати стикерлар яңартылган. Аны чагыштырап, шулай ук «Казан транспорт» кушымтасы буенча түләргә мөмкин.

Кушымта «Датапакс» компаниясе тарафыннан 2022 елның гыйнварында эшләтеп җибәрелгән. Быел Kazan Digital Week халыкара форумында әлеге компания белән тагын бер килешү имзаланды. Ул геолокация мәгълүматлары нигезендә юл йөрү өчен каршылыксыз түләүнең инновацион технологиясен кертү турында иде.