Истанбулда «Туган Батыр һәм ай чәчәге» дигән китап тәкъдим ителде

Истанбулның Рами китапханәсендә Туган Батыр маҗараларының өченче китабы тәкъдим ителде. Бу хакта «Татар-информ» агентлыгына Татарстанның Анталиядәге Мәдәни җәмгыяте җитәкчесе Гөлназ Җиһангирова хәбәр итте. Төрек мегаполисындагы китапханә комплексы – дөньядагы иң зур китап сарайларының берсе, ул бер үк вакытта 4200 кешене сыйдыра ала һәм Төркия Президенты Рәҗәп Тайип Эрдоган катнашында ачылган.

«Туган Батыр һәм ай чәчәге» китабында сюжет линиясе укучыны Анатолия җирләренә күчерә. Тылсымлы чәчәкне табу өчен, герой төрле сынаулар уза, катлаулы сайлау алдында кала, батырлык күрсәтә. Әкият, төрек теленнән тыш, казах, рус, инглиз, гарәп һәм кытай телләренә дә тәрҗемә ителгән.

26 сентябрьдә ТР Милли китапханәсендә проект авторы Радик Абдрахманов аны тәкъдим итү кичәсендә хәбәр иткәнчә, китап балаларны бөтен дөнья буйлап дуслар табарга өйрәтә. Ул проектның халыкара дәрәҗәгә чыгуын һәм бөтен дөньяны татар халкының гореф-гадәтләре, милли характеры белән таныштыруны максат итеп куюын билгеләп үтте.

«Туган Батыр легендалары» проектының рухи остазы – Татарстан мөфтие Камил хәзрәт Сәмигуллин, ул хәзерге заман татар героеның архетибын булдыру максатыннан гамәлгә ашырыла. Яшь татарстанлыларның «Бөтендөнья татар мирасы тарихының бер өлеше бул» фотоконкурсы буенча сайлап алынган фотолары китап геройларының визуаль образлары нигезенә яткан.