Дәүләт Советы Рәисен, электрон бюллетень кулланып, яшерен тавыш бирү юлы белән сайлыйлар

Җиденче чакырылыш парламентның беренче утырышында ТР Дәүләт Советы Рәисен, электрон бюллетеньнәр кулланып, яшерен тавыш бирү юлы белән сайларга дигән тәкъдим булды. ТР Дәүләт Советы депутатлары вәкилләренең оештыру комитеты утырышында шундый карар кабул ителде.

Бүген парламентта җиденче чакырылыш ТР Дәүләт Советы депутатлары вәкилләре киңәшмәсенең беренче утырышы узды. Аны депутат Марат Галиев үткәрде. Бу турыда «Татар-информ» яза.

«Сайлаучылар безнең барыбызга да ышаныч күрсәтте. Депутат эше, беренче чиратта, без аларның мәнфәгатьләрен тәкъдим итсен өчен, сайлаучылар алдындагы бурыч һәм җаваплылык белән бәйле», - диде ул.

Утырышта җиденче чакырылыш ТР Дәүләт Советы депутатлары вәкилләренең оештыру комитеты сайланды. Аның составына, оештыру комитеты рәисе Алексей Созинов һәм секретарь Лилия Маврина белән бергә, 13 кеше керде.

«Оештыру комитетында барлык партияләрнең дә тәкъдим ителүен уйлап эш иттек», - дип искәртте Галиев.

Оештыру комитеты утырышында депутатлар җиденче чакырылыш ТР Дәүләт Советының 20 сентябрьгә билгеләнгән беренче утырышы көн тәртибен карады. Анда 17 мәсьәлә кертелгән. «Җиденче чакырылыш Дәүләт Советының беренче утырышын кайбер мәсьәләләр буенча алтынчы чакырылыш парламент президиумы әзерли. Эчтәлекле өлеше дә вәкилләр киңәшмәсенә йөкләнгән», - диде Маврина.

Бу оештыру утырышы булганга, анда өстәмә мәсьәләләр кертмәскә тәкъдим ителде. «Алтынчы чакырылыштан әзер закон проектлары бар әле. Аларны 27 сентябрьгә планлаштырылган киләсе утырышның көн тәртибенә кертергә тәкъдим ителде», - дип искәртте оештыру комитеты секретаре.

Аның сүзләренчә, беренче сессия тәнәфесендә комитетларны формалаштырырга ниятлиләр. Депутатлар оештыру комитетында парламентның сигез комитетын булдыру турындагы карарны хуплады. «Аларның атамасы һәм саны үзгәрмәде. Ничек бар, шулай калдырырга тәкъдим итәбез», - дип белдерде Маврина.

Моннан тыш, оештыру комитеты утырышында Дәүләт Советы президиумының 13 кешедән торган составы турындагы мәсьәлә хакында да фикер алыштылар. Вазифасы буенча анда сайланган Дәүләт Советы Рәисе, аның урынбасарлары һәм парламент секретаре керә.

Оештыру комитеты президиум составына Ркаил Зәйдуллин, Елена Кузьмичева, Александр Лившиц, Хафиз Миргалимов, Руслан Нигъмәтуллин, Алексей Созинов, Ирек Хәнипов, Эдуард Шәрәфиев һәм Леонид Якунинны кертергә тәкъдим итте.