Новости за 09.01.2025

Новосибирск татарларын татар әдәбиятын тирәнтен өйрәнү һәм туган телдә аралашу максаты белән төзелгән «Илһам» әдәби клубына кушылырга чакыралар. Бу хакта «Новосибирск өлкәсе татар мәдәни үзәге» мәдәният учреждениесе «ВКонтакте» социаль челтәрендәге сәхифәсендә хәбәр итә.

Уфа Шигере авылында «Урал фольклоры ассамблеясе – татар мәдәнияте территориясе» проекты кысаларында фольклор туплауга юнәлтелгән чара булды. Ул «Коммерцияле булмаган социаль юнәлешле оешмаларга ярдәм итү республика ресурс үзәге» коммерцияле булмаган автономияле оешма ярдәме белән оештырыла. Бу хакта Бөтендөнья татар конгрессы хәбәр итә.

Казанның Яңа Аракчино бистәсендә 20 яшьлек кыз тюбингта шуганда каты имгәнгән. «Татар-информ»га әлеге мәгълүматны кызның гаиләсе белән таныш чыганак раслады.

Һава торышы начараю сәбәпле, машина йөртүчеләргә автомобильнең техник торышына, аеруча тормозлау системасына һәм шиналарның торышына игътибар итәргә кирәк. Барлык оптика тиешенчә эшләргә тиеш.

Россиядә яшәүче халыклар телләренең дәүләт реестры булдырылачак, аларның статуслары системага салыначак һәм хәзерге вакытта гамәлдә булган закон урынына яңа «Россия Федерациясе халыклары телләре турында»гы федераль закон проекты әзерләнәчәк. Бу хакта РФ Президенты Владимир Путин йөкләмә бирде.

Метеорологик һәм юл шартлары начар булу сәбәпле, Татарстанда М5 трассасы участогында пассажир автобуслары, маршрут таксилары, йөк транспорты өчен хәрәкәтне вакытлыча чикләделәр.

2025 елда Россиядә яңа автомобильләр сатып алу дүрттән бер өлешкә кимергә мөмкин. 2024 елда 1,6 миллион машина сатылган булса, яңа 2025 елда – якынча 1,2 миллион машина, дип фаразлана. Бу хакта «Россия автомобиль дилерлары» ассоциациясе башкарма директоры Игорь Чикин сөйләде, дип яза «Республика Татарстан» газетасы.

Россия Эчке эшләр министрлыгы мошенниклар акча урлау нияте белән россиялеләрнең Дәүләт хезмәтләре порталындагы шәхси кабинетларына керү өчен куллана торган яңа ике схема турында сөйләде.

РФ мөселманнары Диния нәзарәтенең Голәмәләр шурасы мөселманнарга нинди шартларда берничә хатын алу рөхсәт ителүе язылган фәтва чыгарды, әмма Генераль прокуратура бу фәтваны, Россия кыйммәтләренә каршы килә, дип таныганнан соң, кире алды. РФ мөселманнары Диния нәзарәте рәисенең беренче урынбасары Дамир Мөхетдинов моңа карата үз фикерен белдерде.

Казан 2025 елда яшәү бәясе индексы буенча шәһәрләр исемлегендә 302нче урынны яулады. Рейтингны Numbeo чит ил порталы чыгарды.

Бөтен дөньяда коронавирус йоктыру очраклары саны буенча статистика рәсми мәгълүматлардан ике тапкырга артыграк була ала, чөнки ковидның күп очраклары җиңел формада үтү сәбәпле рәсми рәвештә теркәлмәскә мөмкин. Бу хакта ТАССка эпидемиолог, Россия мәгариф академиясе президенты урынбасары, Россия Фәннәр академиясе академигы Геннадий Онищенко сөйләде.

Россиядә 2025 елның иң кыска эш атнасы башланды. Ул нибары ике эш көненнән тора — пәнҗешәмбе, 9 гыйнвар, һәм җомга, 10 гыйнвар.

Төмәндә чыгучы «Яңарыш» өлкә татар газетасы үзенең 35 еллык юбилее уңаеннан шигърият яратучылар өчен «Яңарыш» - яраткан газетам» дип аталган шигъри бәйге игълан итә. Бу хакта газетаның телеграм-каналында хәбәр ителә.

2025 елның 8 гыйнварында Казанда температура рекорды куелды.

ТР Гидрометеоүзәге мәгълүматлары буенча, ТР башкаласында һава температурасы рекордлы күрсәткечләргә кадәр күтәрелде һәм 2,2 градус тәшкил итте.

Синоптиклар билгеләп үткәнчә, 8 гыйнварда температураның соңгы тапкыр мондый максимумга күтәрелүе 1999 елда теркәлгән.

Azerbaijan Airlines (AZAL) авиакомпаниясе Баку–Казан–Баку маршруты буенча рейсларны «очышларның куркынычсызлыгын тәэмин итү өчен» билгесез вакытка туктата, дип яза РИА Новости компаниянең матбугат хезмәтенә сылтама белән.

Пәнҗешәмбе, 9 гыйнварда, Татарстанда җепшек кар ява. Кайбер районнарда бозлавык, буран булуы ихтимал, ә иртән урыны белән томан булырга мөмкин, диелә ТР Гидрометеорология үзәге фаразында.

Түбән Кама дәүләт автоинспекциясе хезмәткәрләре сәламәтлек мөмкинлекләре чикләнгән ике малайның - Мирон Нагуманов һәм Әскәр Бәдредтиновның хыялын чынга ашырды. Балалар автоинспекторлар эше белән танышырга һәм патруль автомобилендә йөрергә хыялланган. Түбән Кама дәүләт автоинспекциясе хезмәткәрләре Яңа ел бәйрәмнәрендә балаларның теләкләрен үтәгән. Бу хакта https://tat.e-nkama.ru сайтында хәбәр ителә.

Актаныш районы Тыңламас авылының хоккей командасы Башкортстанның Илеш районы Кужбахты авыл җирлегендә махсус хәрби операция барышында һәлак булган якташларыбызга багышланган хоккей турнирында катнашты. Бу хакта «Актаныш» сайтында Ләйсән Газизова яза.

Саба районы мәдәният йортында Татарстанның атказанган мәдәният хезмәткәре Хәниф Тимербаевның иҗат кичәсе узды. Бу хакта https://saby-rt.ru/ сайтында Фәридә Вилданова яза.