Новости за 22.07.2024

Дәүләт Думасында күп балалы һәм инвалид балалар тәрбияләүче гаиләләргә ана капиталы акчасына автомобиль сатып алырга рөхсәт итү тәкъдиме белән чыктылар. Шул хактагы закон проектын бүген Россия парламентының түбән палатасына тапшырачаклар, дип яза «Российская газета».

20 июльдә Башкортстанның Кушнаренко районы Иске Тукмаклы авылында «Батырлар җыены» республика милли-мәдәни спорт бәйрәме кысаларында «Ак-Идел» төркеменә кергән туган якны өйрәнүчеләр катнашында фәнни түгәрәк өстәл узды. Бу хакта ТР Фәннәр академиясенең Ш.Мәрҗани исемендәге Тарих институты матбугат хезмәте хәбәр итә.

Дәүләт Думасының берьюлы өч фракциясе БДИны элек тапшырыла торган гадәти имтиханнар белән алыштырырга тәкъдим итте. Казанның «СОлНЦе» мәктәбе директоры Павел Шмаков әлеге тәкъдимгә карата үз фикерен белдерде.

Татарстанда ТР Дәүләт Советына депутатлыкка кандидатлар күрсәтү этабы төгәлләнде. Ул тыныч кына узды, шикаятьләр булмады. Бу хакта республика Үзәк сайлау комиссиясе хәбәр итә.

Татарстанда яшәүчеләр ТР Дәүләт Советына сайлауларда тавыш бирү өчен «Мобиль сайлаучы» механизмыннан файдалана алачак. Тиздән гаризалар кабул итү башлана, дип хәбәр иттеләр республика Үзәк сайлау комиссиясендә.

Татарстан югары уку йортларында белем алучы 292 студент «Студентлар стартабы» бәйгесенең бишенче чираты җиңүчеләре булды. Аларның һәркайсы үз проектларын гамәлгә ашыру өчен берәр миллион сум акча алды, дип хәбәр итте ТР дәүләт идарәсен цифрлы нигездә үстерү, мәгълүмат технологияләре һәм элемтә министры Айрат Хәйруллин телеграм-каналында.

Татарстанда бала хокуклары буенча вәкаләтле вәкил Ирина Волынец республиканың яшь гражданнарын һәм аларның әти-әниләрен «Волынец белеп тора» проектына чакырды, аның кысаларында 14-17 яшьлек үсмерләрне нәрсә борчуын билгеләү өчен масштаблы сораштыру үткәрелә.

Удмуртия Республикасында узган X Төбәкара татар яшьләре слетында йөздән артык кеше катнашты. Быел алар арасында Түбән Новгород һәм Волгоградтан килгән вәкилләр дә бар, ә иң яшь катнашучыга бер ай тулып кына киткән иде. Бу хакта Бөтендөнья татар конгрессының матбугат хезмәте хәбәр итә.

Алтынчы чакырылыш Дәүләт Советы депутаты, «Бердәм Россия» партиясе әгъзасы, «Эспаньола» батальонының техник өлеш буенча командир урынбасары Марат Галиев II дәрәҗә «Ватан алдындагы хезмәтләре өчен» орден медале белән бүләкләнде. Бу хакта «Татар-информ» агентлыгына парламентарийның ярдәмчесе хәбәр итте.

Бүген Буада махсус хәрби операциядә катнашырга карар кылган егетләрне алгы сызыкка озаттылар. Быел Буада дистәләгән кеше Ватан сагына баскан. Бу юлы махсус хәрби операция зонасына ике ир-егет юл тотты, дип яза «Татар-информ» хәбәрчесе Эльза Кузнецова.

22 июльдән Казанның бөтен җир өсте электр транспорты кондукторларсыз эшли башлады. 7нче трамвай маршруты иң соңгысы булып шундый форматка күчерелде, дип искәрттеләр «Метроэлектротранс» телеграм-каналында.

19 яшьлек Минзәлә егете, РФ Саклану министрлыгы белән контракт төзеп, алгы сызыкка киткән. Хәрби комиссариат янына аны озатырга әти-әнисе, туганнары һәм дуслары килде, дип яза «Татар-информ» хәбәрчесе Эльза Кузнецова.

Бөтендөнья татар конгрессы Башкарма комитеты җитәкчесе урынбасары – Татарстандагы бүлекчәләр белән эшләү комитеты җитәкчесе Ирек Шәрипов Татарстанның Актаныш районына сәфәр кылды. Биредә, Иске Сәфәр авылында төбәкара «Яшәсен гармун, тальян моңнары» җыены оештырылды. Бу хакта Бөтендөнья татар конгрессы матбугат хезмәте хәбәр итә.

Бүгенге көндә Татарстанда 251 күп фатирлы йорт авария хәлендәге һәм сүтелергә яки реконструкция ясалырга тиеш дип табылган. Өстәвенә, шуларның 166сында кешеләр яши. Дәүләт Думасының төзелеш һәм ТКХ комитеты рәисенең беренче урынбасары Владимир Кошелевның матбугат хезмәте шундый мәгълүматлар белән уртаклашты.

Татарстанда 22 июльдә көннең беренче яртысында бик көчле яңгыр аркасында шторм кисәтүе игълан ителде. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

Соңгы 80 елда Мәскәү белән Дамаск төрле өлкәләрдә хезмәттәшлек итте. РФ Президенты Владимир Путин Россия һәм Сирия арасында дипломатик мөнәсәбәтләр урнашуга 80 ел тулу уңаеннан Сирия Президенты Бәшәр Асадка җибәргән телеграммасында шулай дип язган.

Дүшәмбе, 22 июльдә, Татарстанның кайбер районнарында яңгыр фаразлана. ТР Гидрометеорология һәм әйләнә-тирә мохитне күзәтү идарәсе мәгълүматлары буенча, республиканың кайбер районнарында урыны белән яшен һәм томан көтелә.

АКШ президентына кандидат Дональд Трамп Штатларның 46 нчы башлыгы Джо Байденның «президент узышыннан» чыгу карары турында үз фикерен белдерде.

Татар җырчысы һәм Ovoz музыкаль шоу (Россиядәге «Голос» телевизион тапшыруының үзбәк варианты) ярымфиналисты Сәидә Мөхәммәтҗанованың Unutma meni («Онытма мине») җырына клибы чыккан. Композиция үзбәк телендә язылган. You Tube видеохостингында чыккан видео 24 сәгать эчендә 15 мең карау җыйган.

Америка Кушма Штатларының 46 нчы президенты Джо Байден президентлыкка кандидатлыктан төшеп калуы турында игълан итте.

Чаллы шәһәр хакимиятендә юл хәрәкәте иминлеген тәэмин итү комиссиясе утырышы булды. Анда Чаллының баш дәүләт автоинспекторы Радий Кадиков шәһәр мэры Наил Мәһдиевка электросамокатны прокатка бирүне тыйган өчен рәхмәт әйтте. Бу хакта «Шәһри Чаллы» газетасы яза.

Балтач районының яшьләр сәясәтенә караган оешмалары – «Факел» яшьләр (яшүсмерләр) клубы, «Хыял» яшьләр үзәге һәм «Форпост» оешмасы — «Сабантуй» ял паркында махсус хәрби операциядә катнашучыларның балаларына дуслык бәйрәме уздырды. Бу хакта «Хезмәт» газетасы яза.

Мөслимнең «Туган як» агрофирмасында Кыр көне үтте. Бу хакта «Мөслим-информ» сайты яза.