Новости за 03.07.2024

«Казан утлары» журналында «Татмедиа» акционерлык җәмгыяте ярдәме белән ТР халык язучысы Вахит Имамовның «Кәнәфи» китабы дөнья күрде. «Казан утлары» китапханәсендә чыгучы кесә форматындагы 27 нче китапны «Татар-информ»да узган матбугат очрашуында тәкъдим иттеләр. Чараны язучы, Татарстанның атказанган сәнгать эшлеклесе Рафис Корбан алып барды.

Бүгенге көндә Татарстанда 129 фәнни оешма исәпләнә. Тикшеренүләр белән шөгыльләнә торган хезмәткәрләр саны 14 мең кешедән арта. «Татарстан – яңа гасыр» Республика иҗтимагый хәрәкәте Югары совет утырышы кысаларында аның рәисе, Татарстан парламенты башлыгы Фәрит Мөхәммәтшин шулай дип белдерде.

Татарстан гаять зур сәнәгый потенциалга ия, хәзерге дөнья төзелеше шартларында бу аеруча мөһим. ТР Дәүләт Киңәшчесе Минтимер Шәймиев «Татарстан – яңа гасыр» Республика иҗтимагый хәрәкәте утырышы кысаларында шундый фикерен белдерде.

Эльмира Галимова ТР Фәннәр академиясе Татар энциклопедиясе һәм төбәкне өйрәнү институты директоры итеп билгеләнде. Яңа җитәкчене коллективка Татарстан Фәннәр академиясе президенты Рифкать Миңнеханов тәкъдим итте, дип яза «Миллиард татар» сайты.

Татарстан Рәисе Рөстәм Миңнеханов Вьетнамның Екатеринбургтагы* Генераль консулы Динь Ван Донг белән очрашуда үзара хезмәттәшлекне үстерүнең перспективалы юнәлешләре турында фикер алышты.

Бүген, 3 июль, Бөтендөнья татар конгрессында «Оста куллар – 2024» бәйгесендә җиңүчеләрне бүләкләү тантанасы узды. Исегезгә төшерәбез, быел Россиядә игълан ителгән «Гаилә елы» уңаеннан Бөтендөнья татар конгрессы «Татарлар» газетасы белән берлектә 2024 елның 14-28 май аралыгында «Оста куллар» бәйгесен уздырды.

Мәскәүнең Татар мәдәни үзәге иҗат коллективлары, шулай ук башкорт һәм чуваш артистлары Яңа бистә паркында 2024 елгы Мәскәү гомумшәһәр Сабан туеның «генераль репетициясе»н үткәрде. Бу хакта Мәскәү шәһәре татар милли-мәдәни автономиясе төбәк иҗтимагый оешмасының матбугат хезмәте хәбәр итә.

Россия хәрби-тарихи җәмгыятенең Татарстандагы төбәк вәкиллеге Сугыш хәрәкәтләре ветераннары көне уңаеннан «СВОИ» дип аталган кыска метражлы фильмнар циклын тәкъдим итте. Алты роликтан торган серия үз иленең язмышына битараф булмаган ватандашлар хакында сөйли.

Татарстан Рәисе Рөстәм Миңнеханов «Татарстан - яңа гасыр» Республика иҗтимагый хәрәкәтендә катнашучыларны берләшмәнең 25 еллык юбилее белән тәбрик итте. Югары совет утырышында аның котлау сүзләрен ТР Рәисе Администрациясе җитәкчесе урынбасары Руслан Мөхәрләмов тапшырды.

4 июльдә Дәүләт Думасында, кызыксынган барлык якларны чакырып, Бердәм дәүләт имтиханы мәсьәләсе буенча зур тыңлаулар узачак. Бу хакта «Татар-информ» агентлыгына Федераль Җыенның түбән палатасына Татарстаннан сайланган депутат Илдар Гыйльметдинов хәбәр итте.

Татарстанның Тукай районы Кече Шилнә авыл җирлегендә куәте 42 мең тонна тәшкил иткән элеваторны төзү эшләре тәмамланган. Бу хакта ТР Дәүләт төзелеш күзәтчелеге инспекциясе матбугат хезмәте хәбәр итә.

Һөнәрләр һәм күнекмәләрне үстерү агентлыгы, яки WorldSkills Russia генераль директор Роберт Уразов һәм агентлык аппараты җитәкчесе Данир Мөхәммәтҗанов кулга алынганнан соң эшен дәвам итәчәк. Коммерцияле булмаган автономияле оешманың административ директоры урынбасары Айдар Абдуллин генераль директор вазифаларын башкарачак, дип хәбәр итә ТАСС агентлыгы.

«Яндекс» тәрҗемәчесен татар сөйләмен аңларга өйрәтәчәк һәм татар теле Россия халыклары телләре арасында беренче шундый тел булачак. Бу хакта компаниянең матбугат хезмәте хәбәр итә.

30 июнь көнне «Яңарыш» газетасын республика бюджетына кертүгә зур өлеш куйган, Удмуртия татарларының милли-мәдәни автономиясе рәисе булып эшләгән Нәзирә Касимова вафат булган. Бу турыда «Яңарыш» газетасы хәбәр итте.

Галимҗан Ибраһимов исемендәге Тел, әдәбият һәм сәнгать институтына яңа җитәкче билгеләнде. ТР Фәннәр академиясе президенты Рифкать Миңнеханов коллективка яңа директорны – Халиков Илгиз Илдар улын тәкъдим итте. Бу хакта «Миллиард.Татар» сайты телеграм-каналында хәбәр ителә.

Бүген, 3 июльдә, Татарстанда урнашкан антициклон нәтиҗәсендә температура фонының күтәрелүе дәвам итәчәк. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

Ульяновскиның «Өмет» газетасында Мәрьям Хәйбуллованың «Димитровград Сабан туе» дигән язмасы чыкты.

Чиләбе өлкәсе татарлары конгрессы Кунашак муниципаль районы хакимиятенең Мәгариф идарәсе белән балаларны «Йолдызлык» милли лагерена чакыра. Этномәдәни смена 26 июльдән 8 августка кадәр эшли. Ул татар халкының гореф-гадәтләренә багышлана. Бу хакта «ВКонтакте» социаль челтәрендә «Чиләбе өлкәсе татарлары конгрессы» сәхифәсендә хәбәр ителә.

Казанның ике паркында 2 һәм 3 июльдә лекцияләр укылачак. Шәһәр халкы алдында Казан дәүләт университетының Яшь галимнәр ассоциациясе вәкилләре чыгыш ясый. Бу турыда Казан мэриясе хәбәр итте.

Төмәннең «Яңарыш» газетасында Рәүфә Кангазинаның «Саубуллашу вальсын биеделәр» дигән язмасы чыкты.

Актаныш районы мәдәният хезмәткәрләре район башкарма комитет җитәкчесенең социаль мәсьәләләр буенча урынбасары Дилбәр Әнвәрова җитәкчелегендә Башкортстанның Ишимбай районы Урман-Бишкадак җирлегендәге геопаркка эшлекле сәфәр кылды. Бу хакта «Актаныш-информ» хәбәр итә.

Әлмәтлеләр даими рәвештә җирле хакимиятнең игътибарын сулыкларның аяныч хәленә юнәлтә. Бу хакта «Әлмәт таңнары» хәбәр итә.

Июнь аеның иң матур көннәренең берсендә Азнакай районы Сәпәй авылы Мәдәният йорты директоры Ләйсән Латыйпова олысын-кечесен җыеп, җиләк җыю бәйрәме оештырды. Бу хакта «Азнакай» сайтында Таңсылу Саниева яза.

Зәй районы Бура-Киртә авылында гомер итүче Вәсимә Зәйнетдинованы Югары Пәнәче авыл җирлеге башлыгы Мөнир Туктаров бер гасырлык юбилее белән өенә килеп тәбрикләде. Бу хакта «Зәй яңалыклары» сайтында Энҗе Әгъләмова яза.

Лениногорскиның 11нче янгын сүндерү-коткару часте эшчәнлегенә 70 ел булган. Бу хакта «Заман сулышы» сайтында Наил Гыйльметдинов хәбәр итә.