Italia sender asylsøkjarar til Albania

Italia gjer eit nytt forsøk på å sende migrantar til leirar i Albania, der dei skal vere medan italienske styresmakter behandlar asylsøknadene deira.

Tysdag kom eit italiensk marinefartøy til den albanske hamnebyen Shëngjin. Om bord i skipet var 49 migrantar som vart stansa i internasjonalt farvatn på veg til Italia.

Ifølgje italienske medium kjem dei frå Bangladesh, Egypt, Elfenbeinskysten og Gambia.

Italia prøvde også i oktober og november å frakte asylsøkjarar til Albania, der det etter avtale mellom dei to landa er oppretta to leirar.

Italienske domstolar sette ein stoppar for planen, men i desember fekk statsminister Giorgia Meloni delvis støtte då italiensk høgsterett slo fast at domstolane ikkje kunne overprøve avgjerda til regjeringa.

Avtalen mellom Italia og Albania er no til behandling i Den europeiske menneskerettsdomstolen som har varsla ei høyring 25. februar. (NPK)