Փառանձեմն ու Թագուհին. Թե ինչու դու չես հասցնում հեծանիվ քշել

Փառանձեմն ու Թագուհին կիրակի վազվզուքի արանքում ձեռի հետ թերթում են ռիլերը և կրկին նկատում են, որ երկրի ղեկավարը այս անգամ եսիմ քանի կիլոմետր հեծանիվ է քշել: Փառանձեմն ու Թագուհին գիտեն, որ հեծանվասպորտը շատ լավ է թե առողջության, թե կազմվածքի համար: Նրանք նաև հավանում են այն գաղափարները, որոնք քարոզում է իշխանությունը, ու որոշում են հաջորդ օրը անպայման հեծանիվ քշել: 

Փառանձեմի տանը հեծանիվ կա, Թագուհին ծախսում է իր աշխատավարձի կեսը նոր և լավ հեծանիվ գնելու համար: Մարզահագուստի և սաղավարտի համար գումարը չի բավականացնում: Պարտք են անում: Փառանձեմն ու Թագուհին երկուսն էլ աշխատում են: 

Թագուհին արթնանում է առավոտյան 7:30-ին, մի կերպ խցկվում ավտոբուս: Հասնում է աշխատավայր: Գործն ավարտվում է 18:00-ին: Կանգառում տուն տանող ավտոբուսին սպասում է 25 րոպե: Տրանսպորտն այնքան լցված է լինում, որ չի կարողանում նստել: Ստիպված սպասում է երկրորդին: Եվս 35 րոպե, հաշվի առնելով, որ այդ ժամին քաղաքում խցանումներ են: Կանգնած ու ճմռթված վիճակում Թագուհին տուն է հասնում 50 րոպե անց: Արդեն մթնել է: Թագուհին մտնում է մթերային խանութ: Գնումներ կատարում: Հասնում է տուն: Ճաշ է եփում, արդուկ անում, երեխաների հետ դասեր, հետո հավաքել թափթփված բոլոր իրերը: Հիմա էլ բոլորը թեյ են ուզում: Քաղցր ինչ-որ բան պատրաստել: Նորից տնայիններ: Լվացք: Լվացքը փռել: Արդեն ժամը տասն է: Թագուհին նայում է հեծանիվին: Դրսում մութ է ու ցուրտ: Ինքն էլ այնքան հոգնած է, որ պատրաստ է հենց տեղում պառկել տան գորգի վրա ու քնել: 

Փառանձեմը նույնպես աշխատանքը 18:00-ին է ավարտում: Նա իր մեքենան ունի: Բայց մինչև խցանումների մեջ տուն է հասնում, դառնում է ժամը 19:00-ը: Հետո, դե, մտնել սուպերմարկետ: Դրամարկղի մոտ հերթեր: Լվացք, արդուկ, երեխաներ, տնեցիներ, մաքրություն, օգնություն հարևանին: Տանը կիսատ թողած գործ, որ պետք է ավարտել արդեն գիշերը, սեփական լափթոփի դիմաց: Փառանձեմն անգամ չի էլ հիշում, որ հեծանիվ ունի: 

Երկուսն էլ մտածում են՝ ոչինչ, շաբաթ-կիրակի կքշեն: Վերջապես ազատ ժամ են գտնում: Պարզվում է՝ տարածքում պուրակ չկա: Պետք է կանչել տաքսի կամ սեփական մեքենայով գնալ: Վերցնել հեծանիվը տանել ինչ-որ այնպիսի տարածք, որտեղ կարելի է քշել: Հասնում են Բուսաբանական այգի: Սկսում են քշել, ընթացքում մեկը հիշում է, որ վաղը երկուշաբթի է, պետք է հիփոթեքի ամսական վճարը մուծի: Փող չկա: Մյուսը՝ վարկերի մասին է հիշում, ու որ աշխատավարձի կեսը տվել հեծանիվ է գնել, արդյունքում չգիտի՝ ինչպես ամսվա երկրորդ կեսը ձգել: Երկուսն էլ հեծանիվը տխուր քշելուց հետո, հոգնած մտնում են խանութ: Քանի որ պիտի խնայողություն անեն, գնում են մի տասը կիլո կարտոֆիլ և մակարոն ու հնդկաձավար: Միայն ածխաջրեր: Միսն էլ՝ հավ, բայց էն դրսի սառեցրածներից, որովհետև պետք է մինչև ամսվա վերջ ձգեն: 

Գնում են տուն, նորից եփութափ, զանգ աշխատավայրից: Բողոք դպրոցից: Մուննաթ հարևանից: Ամանները լվանալիս Փառանձեմն ու Թագուհին մտածում են՝ ախր ինչպե՞ս է ստացվում, որ երկրի վարչապետը, որը պիտի այդքան զբաղված լիներ, ժամանակ է գտնում հեծանիվ քշելու, իսկ իրենք հազիվ գտան այդ մի ժամը, այն էլ չվայելեցին:

Փառանձեմ ու Թագուհին հետո մտածեցին, որ եթե լինեին հատուկ վարձած մարդիկ, որոնք կանեին բոլոր տնային գործերը, եթե նրանց երթևեկությունը հեշտացներ անձնական մեքենան, և այդ մեքենայի ճանապարհը բացող ոստիկանությունը, եթե նրանք չմտածեին իրենց օրվա հացի մասին, ֆիզիկապես այդքան չհոգնեին, եթե մարդկանց մի ամբողջ խումբ ամեն օր իրենց սպասարկեր և անգամ որոշեր, թե իրենք ինչ են հագնելու, այդ ժամանակ գուցե իրենք էլ աշխարհի բոլոր քաղաքների փողոցներով ուրախ երթևեկեին և առողջ ապրելակերպ քարոզեին: 

Փառանձեմն ու Թագուհին սպունգով տրորում էին թավային կպած յուղոտ ճաշի հետքերը ու հասկանում, որ առաջին հայացքից հեծանիվն այդքան դեմոկրատական, մարդամոտ և էժան փոխադրամիջոց է թվում: Բայց պարբերաբար հեծանիվ քշելը իրենց երկրում արտոնություն է, որ ամեն մեկին հասու չէ: Հատկապես հասարակ, միջին աշխատավարձով ապրող քաղաքացիներին: 

Երեկո էր: Երկրի ղեկավարը Սևանի ճանապարհին արդեն քանի կիլոմետր հեծանիվ էր քշում, իսկ Փառանձեմն ու Թագուհին կեղտոտ ամանները դեռ լվանում էին ու լվանում…

Լիաննա Խաչատրյան

MediaLab.am

The post Փառանձեմն ու Թագուհին. Թե ինչու դու չես հասցնում հեծանիվ քշել first appeared on MediaLab Newsroom-Laboratory.