Крыжовник кайнатмасы рецепты

«АиФ» сайтында крыжовник кайнатмасы рецепты чыкты.

Ингредиентлар:

• 1 кг крыжовник
• 1 кг шикәр
• 200 мл су (сироп өчен)
• 1-2 чәй калагы лимон кислотасы (теләк буенча)
• 2-3 чия яфрагы
• 1 дарчин таякчыгы

Эш тәртибе:

Крыжовникны аралагыз, сабак һәм «койрык»ларын алыгыз. Яхшылап юыгыз. Ярыклар булмасын өчен, җимешләрне теш чистарта торган таякчык белән бераз тишәргә мөмкин.

Банкаларны һәм капкачларны духовкада (120°C, якынча 15 минут) яки пар өстендә стерильләштерегез. Киптерегез.

Киң кәстрүлгә шикәр салыгыз, су өстәгез, уртача утта кайнап чыкканчы болгата-болгата эретегез.

Әзер крыжовникны кайнап торган сиропка салыгыз, сак кына болгатыгыз һәм кайнап чыксын. Тәмләткечләр өстәгез (әгәр куллансагыз). 5 минут кайнатыгыз, күбеген җыеп барыгыз.

Уттан алып, 3-4 сәгатькә (яки төнгә) калдырыгыз, җиләкләр сироп белән туенсын.

Кабат кайнатырга куегыз, 5-7 минут пешерегез. Лимон кислотасын куллансагыз, ахырда салыгыз.

Тагын бер тапкыр шул ук процессын кабатлагыз. Соңгы тапкыр 15-20 минут пешерегез. Әзерлеген салкын тәлинкәгә бер тамчы сироп тамызып тикшерегез: әгәр агып китмәсә – әзер. Чия яфракларын һәм дарчинны алыгыз.

Кайнар кайнатманы стерильләштерелгән банкаларга тутырыгыз, иң өске кырыена кадәр тутыру мөһим.

Шунда ук стериль капкачлар белән ябыгыз. Банкаларны әйләндереп, җылы юрган белән төреп, тулысынча суынганчы калдырыгыз (12-24 сәгать).

Салкын, караңгы урында саклагыз.

Фото: © «Татар-информ», Гөлүзә Василова