Стилист киңәшләре: «Үтә күренмәле, сыер принтлы киемнәр модада»

Эчке кием стиленә һәм җиңел костюмнарга өстенлек бирү

Җәйге сезонның нинди трендларын аерып әйтә аласыз?

Күпләргә ошаган бохо стиле җәйге актуаль тренд булып кала. Бу – җиңел тукымадан эшләнгән «очып торган» кебек җиңел күлмәкләр, озын итәкләр, топлар, воланлы блузкалар. Боларның барысын да табигый материаллардан, мәсәлән, агачтан яки күннән бизәнү әйберләре белән тулыландырырга мөмкин.

Киләсе тренд – эчке киемгә охшатып тегелгән әйберләр. Монда күлмәк-комбинацияләр һәм декольте зонасында челтәрле топлар, үтә күренмәле итәкләр керә. Шулай ук үтә күренмәле һәм җиңел тукымаларга өстенлек бирелә – бу органза, шифон, челтәрле эшләнмәләр.

Бу очракта үтә күренмәлелек – җиңеллек, күп катламлылыкны чагылдыра. Монда үтә күренмәле киемне кая киеп йөрүегезне аңлау мөһим.

Оверсайз тренды үз позицияләрен бирми, ул йомшак силуэт эффектын тудыра. Игътибар үзәгендә иркен жакетлар, чалбарлар, иркен күлмәкләр, костюмнар була.

Бермуд шорты (киң балаклы, озынлыгы тезгә җиткән шорты – ред.) һаман да актуальме?

Алар һаман да җәйге гардеробның универсаль база элементы булып кала, ул офис өчен дә, көндәлек өчен дә бик яхшы туры килә. Бермудлар чалбар һәм мини-шортыларга бик яхшы альтернатива булып тора.

Игътибар итәргә теләгән тагын бер тренд – ул киң костюмнар һәм чалбарлар, трансформер әйберләр, эчтәге каты булмаган жакетлар. Аларны офиста да, көндәлек тормышта да, шул исәптән очрашуларга яки ялда да кияргә мөмкин.

Палаццо (киң балаклы – ред.) чалбар, банан-чалбар, каптырмасыз яки бәйләп куела торган жакетлар җәй өчен әйбәт.

Сыер принты – җәйнең яңа тенденциясе

Бу җәй нинди төсләр модада?

Бу сезонда йомшак төсләр дә, ачык төсләр дә актуаль: ала миләүшә, бөтнек, шәфталу, атланмай төсләре, шулай ук лайм, фуксия төсләре, кызгылт сары. Әгәр дә модадан беркайчан да диярлек чыкмый торган табигый төсмерләр турында сөйләсәк, бу – көрән, зәйтүн төсе, һәм ком төсмерләре.

Җәйге образлар өчен чәчәк принтлары сайларга кирәкме, әллә алар искергәнме?

Чәчәкле принт трендта кала – вак бөреләрдән алып эре экзотик чәчәкләргә кадәр. Һәм алар никадәр күбрәк булса, шулкадәр яхшырак. Хайван принтлары актуаль, мәсәлән, леопард принты. Елан принды шулай ук актуаль.

Бу сезонның төп һәм яңа принтларының берсе – сыер принты. Борчаклы принт та трендта. Ул төрлечә – вак борчаклардан алып эре рәсемнәргә кадәр, аларның комбинациясе дә була ала. Буй-буй принт төрле вариантларда популяр: буй-буй тар, киң, вертикаль, горизонталь, контрастлы булырга мөмкин.

Кыска итәк озынны җиңәрме?

Соңгы сезоннар дәвамында без итәкләрнең кыскара баруын күзәтәбез. Быел да кыска итәк озыннан өстенме? Кыска итәкләрне нәрсә белән яраштыру яхшырак?

Кыска итәк чыннан да трендта. Ул күбрәк кыюлыкны, яшьлекне, провокацияне чагылдыра. Кичәләр, урамда йөрү, фотосессияләр өчен әйбәт туры килә. Миди итәк – ул ритм һәм өлгергәнлек турында. Ул һичшиксез классика булып кала бирә. Аны үкчәле аяк киеме белән дә, кроссовка белән дә яраштырырга мөмкин. Уртача озынлыктагы, ягъни миди итәк универсаль һәм теләсә нинди дресс-кодка диярлек туры килә. Кыска итәкне оверсайз кием белән кию – иң яхшысы. Образга билне ассызыклау өчен каеш өстәргә була.

Актуаль һәм бик кызыклы комбо – ул мини-итәк һәм шәрә тәнгә яки юка майка өстеннән киелгән классик жилет. Бу төз булып күренергә мөмкинлек бирәчәк. Зур алкалар, кечкенә сумкалар һәм авыр сандали мондый образга бик яхшы туры киләчәк. Бераз кыюлык өстәү өчен, мини-итәкне футболка, спорт жакеты белән тулыландырырга мөмкин.

Шәһәрдә йөрү яки офиста эшләү өчен челтәрдән тегелгән кием ни дәрәҗәдә урынлы?

Иң яхшысы, әлбәттә, аны ялда, пляжда яки курортта кию. Сетка-күлмәкләр, комбинезоннар, су коену костюмнары өстендәге челтәрле туникалар һәрвакыт урынлы булачак. Шәһәрдә көндәлектә челтәрне майка яки джинс чалбар өстеннән кияргә мөмкин. Ягъни бу – кардиганнар яки челтәрле күлмәкләр, топлар яки вак челтәрле күлмәкләр булырга мөмкин.

Офиска килгәндә, челтәр җиңле, җиңел текстуралы, күкрәк өлеше ябык, тездән бераз югарырак озынлыктагы туры күлмәкләргә өстенлек бирергә кирәк.

Челтәрле босоножкалар яисә үкчәле вьетнамкалар

Җәйге образларга аяк киемен ничек сайларга?

Иң популяр модельләр – челтәрдән яисә үтә күренмәле пластиктан ясалган үтә күренмәле сандалилар һәм босоножкалар. Кара төстәге классик балеткалар теләсә нинди әйберләр белән туры килә. Шулай ук балериналарның аяк киемен хәтерләткән атлас балеткалар яки челтәрле балеткалар да актуаль.

Замшадан, бәрхеттән һәм хәтта денимнан модельләр трендта. Күн босоножкалардан тыш, квадрат борынлы, металл акцентлы яки минималистик каешлы үкчәле вьетнамкалар, шулай ук үзенчәлекле лодочкалар дә популяр: традицион шпилька урынына архитектура объектын хәтерләткән гадәти булмаган формадагы ниндидер структур үкчәләр, җиңеллек эффекты тудыручы үтә күренмәле яки металл үкчәләр дә модада. Аяк киеме сайлаганда, барыбер үз стилеңә һәм уңайлылыгыңа йөз тотарга кирәк, бары тик модага иярергә кирәкми.

Исегездәме, мода – ул уен, ә сез – төп уенчы. Стиль – ул кием генә түгел, ә сезнең эчке халәтегез дә. Елмаегыз, үз-үзегезгә ышаныгыз, үзегезне яратыгыз, шул чагында сезгә теләсә нинди кием килешәчәк.

Чыганак: «Казанские ведомости»