«Улым белән күрешергә очам» – Ришат Фазлыйәхмәтовның шатлыклы көне

Җырчы Ришат Фазлыйәхмәтов бик озак еллардан соң беренче тапкыр улы белән очрашачак.

«Бүген минем бик шатлыклы көнем, дуслар. Улым белән күрешергә очам, Аллаһы боерса, малаем Искәндәр белән», – дип сөйләде ул, самолеттан видеолар куеп.

Искәндәр – Ришат Фазлыйәхмәтовның беренче никахыннан туган улы. Алар тормыш иптәше Гөлназ белән малайлары кечкенә чакта ук аерылышкан. Ришат исә улы белән озак еллар аралашмады. «Интертат» белән әңгәмәдә җырчы: «Бала белән аралашасым килә. Хатыным да каршы түгел. Аларның гаиләләре белән күрешәсем генә килми. Әлегә… Үпкә хисем бар. Малай минем исемдә, шунысы мөһим. Хатын миңа шалтыратып, язып: «Кил, без Казанда», – дип хәбәр итәргә тиеш. Әгәр миңа шулай дип язса, мин киләм. Андый гаиләләр бик күп: хатын-кыз әзрәк акыллы булмаса, ир кеше нәрсә эшләсә дә, барып чыкмый. «Әйдә, күрешик», – дип язган вакытларым күп. Ә ул «игнорировать» итә, – дип сөйләгән иде.

2022 елда Ришат Фазлыйәхмәтовның алиментлар түләмәве, улына миллион сумга якын бурычы җыелганлыгы билгеле булды. «Татар радиосы»ның юбилей концерты алдыннан Ришат Фазлыйәхмәтовны суд приставлары алып китте. Ул бу хәлләрдә элекке хатыны Гөлназны гаепләде.

Инде күпме вакытлар узганнан соң, Ришатның элекке хатынының гаиләсе белән мөнәсәбәтләре җылынып киткәнме, ничек улы белән очрашырга булган? Бу хакта җырчы әлегә хәбәр итмәде.