Блогер Рамилә Хөснетдинова тагын ире янына махсус хәрби операция зонасына барган

Блогер Рамилә Хөснетдинова, гуманитар йөк илтүчеләр белән махсус хәрби операция зонасында хезмәт итүче ире янына барган. Ул шундый ук куркыныч сәфәргә узган елның август аенда да барып кайткан иде инде, тик ул вакытта Рамилә ире белән очраша алмады. Ничек кенә җаен табарга тырышсалар да, Инсафны, хатыны белән күрешү өчен, алгы сызыктан чыгармадылар.

Ә бу юлы икесенә дә бәхет елмайган. Көтеп алынган очрашу мизгелләрен блогер сәхифәсендә күрсәтте.

«Бик сагындым… Ходаем, бу көнне мин нинди генә хисләр кичермәдем. Әле дә хушыма килә алмыйм, видеоларны карыйм да, эйфория халәтендә йөрим. Иң якын кешеңне 7,5 ай күрмичә, аның тавышын ишетмичә яшәү бик авыр», – дип яза ул.

Инсаф махсус операциягә мобилизацияләнеп алынган иде. Рамилә белән Инсаф ике бала тәрбияли.

• Хәрби операциягә ире янына барып кайткан Рамилә: «Без илткән гуманитар ярдәм янып беткән»