«Атып ега, 5 тапкыр ата, тагын 6 тапкыр терәп ата...». Ире үтергән хатынның 4 баласы ятим

Кировск шәһәрендә яшәүче ир-ат үзенең 3 баласының анасын үтергән дә мәетен кар белән күмеп куйган. Аны 12 елга ирегеннән мәхрүм иткәннәр. Бу турыда «Комсомольская правда» яза.

46 яшьлек Кирилл элеккеге хатыны Маринаны (исемнәр үзгәртелә) беренче тапкыр үтерә алмый. Ул хатынга 3 тапкыр ата, аннары урлап алып китә һәм планын тормышка ашыра.

Фаҗига 2023 елда Мурманск өлкәсендә була. 26 мартта Кирилл пневматик газ-баллонлы винтовка ала һәм 42 яшьлек элеккеге хатыны яши торган өй янына машинада килә. Һәм көтеп тора...

Кич белән соң гына Марина өйгә кайта, аны өйдә 4 баласы көтә, өчесе Кириллдан туган. Ләкин ул подъездга кадәр кайтып җитми. Кирилл машина салоныннан аңа ата, Марина карга егыла, ярасы җитди була. Ләкин кан күреп тә, ир-ат тукталмый.

«Ир-ат машинадан чыга, утырып торган хатын янына килә һәм аңа тагын 5 тапкыр ата. Яралар хатынның гомере өчен куркыныч булуын һәм үлемгә китерәсен аңлый. Ул машинаны алып килә һәм хатынны салонга сала, аннары җинаять урыныннан китә», – дигәннәр Кировск шәһәр судында.

Аткан, хатын-кыз кычкырган тавышлар өйдә яшәүчеләр ишетә. Алар ни булганын күрми, полициягә хәбәр итәләр. Тиз арада килгән хокук саклаучылар карда кан эзләрен күрә.

Бу вакытта Кирилл элеккеге хатынын торак йортлардан читкәрәк алып китә, тагын 6 тапкыр терәп ата, Маринаның исән калу өмете булмый. Ир-ат аның мәетен сәнәгать мәйданчыгында кар белән күмеп калдыра.

«Берничә сәгать узгач, машинаны Апатиты шәһәрендә автозаправкада Дәүләт автоинспекциясе хезмәткәрләре күрә. Йөртүчене полиция бүлегенә алып киләләр», – дигән Эчке эшләр министрлыгы рәсми вәкиле.

Маринаның мәетен икенче көнне Кириллның машинасындагы видеорегистратор язмаларын карап табалар.

Ачыкланганча, Кирилл элеккеге хатынына бик нык үпкәләгән. Никахлары бәхетсез булган, аерылышкач та алар еш талашкан. Ир-ат берникадәр вакытка Мурманск шәһәренә күчеп киткән. Ләкин элеккеге сөйгәненнән үч алу теләге аны җибәрми, ир-ат Кировскига әйләнеп кайта.

Кириллны 12 елга ирегеннән мәхрүм иткәннәр.

Маринаның балаларын туганнары тәрбиягә алган, диелә хәбәрдә.