Ханты-Мужи – ӆыӆаң йиңк

Ханты-Мужи щит Ӆорвош район карра йис курт, Ай Ас сыӆна лайӆ. Щита топ йи васхули, нэмаӆ Лесная. Щи юканны ӆув Куноватской волость исповедной ропатайтна мули 1794-мет таӆ эваӆт Мужигородской кат хаттэӆаң куртты лаваӆта питса.

Итта щита «Живун» нэмпи этнографической парк ропытӆ, щит каман верам пормас эттыды таха. Касаң нэңху щита емаң юх хоща щищкан ӆэрат йирман лаңхапса амамащӆата веритӆ, сай па хуӆ хасэңк енщта.

Ӆопасат вантыӆты па хора вуӆты. Хор: Вера Климова.

Щита рахал сыяӆата хоты итта энамты нэңхэт карра йис олапсы ты маса савиман тайӆэӆ. Щи томпына Ханты-Мужи хуват сосыӆыман нын веритӆаты «Мув ӆоңеӆын таӆ хот», «Кат ятпи ӆопас», «Йи курпи ӆопас» сыяӆаты. Щимащ лопасат па хатат Вершина Войкар куртна верман оллат, щиӆта вантман тата па версайт.

«Войкарский частокол», Войкарской вас Усть-Войкары курт хощаңна археологической раскопкайт верам порайна мощатам пормасат хуват ищи щита верса.

Таӆ сыса ай хопат ияха актсайт. Хор: Вера Климова.

Касаң вай хоща ӆыс аматты вер эттаман ол. Йиӆап энамты нявремат эӆты кас вантта мала щирна касаң вай мощатта рахал.

Тампус эваӆт Ӆорвош каӆаңаң нэңхэт емаң хатӆ Ханты-Мужи куртна верта питӆа. Хой топ ком сытӆ, щимащ хорам тахайна ёхтыӆыяты. Сэңк ям хонты нэңхэт йи номас понман йис верат алңищ туӆӆаӆ.

Вера Климова хансам потар