Ըմբիշները հերքում են. Ֆեդերացիան իրենց աշխատավարձը չի ուշացնում

Ըմբշամարտի ֆեդերացիայի ներկայացուցիչները հանդիպել են լրագրողների հետ ու խոստովանել, որ իրենք վիրավորված են նման սուտ հրապարակման համար: 

 

Լեւոն Ջուլֆալակյան, հունահռոմեական ոճի հավաքականի գլխավոր մարզիչ

 

Տհաճ էր, երբ առավոտյան կարդացի «Ժամանակ» օրաթերթի նյութը: Տպավորություն է, որ եղած լավն էլ փորձում են փչացնել, մենք, իսկապես, սա չենք կարողանում հասկանալ; 

 

2009-ից Սամվել Կարապետյանն է մեր ֆեդերացիայի նախագահը եւ այդ բոլոր տարիներին մեր հավաքականների ամբողջ անձնակազմը միշտ պատշաճ ձեւով վարձատրվել ու պարգեւատրումներ է ստացել: Այս նյութը չի համապատասխանում իրականությանը, չգիտեմ, թե ովքեր են արել սա, բայց անչափ վիրավորական է:

 

Հրանտ Ենոքյան, ըմբշամարտի ֆեդերացիայի փոխնախագահ

 

Ամեն տարի մեր ֆեդերացիան հաշվետոություն է ներկայացնում, որտեղ բոլոր ֆինանսական մուտքերն ու ելքերը նշվում են: Այնպես որ, մենք միշտ հրապարակային ենք գործում: Ինչպես կարող էր Սամվել Կարապետյանը չվճարել ըմբիշներին, եթե նա անգամ այլ մարզաձեւերի ներկայացուցիչների է պարգեւատրել:

 

Աշխատավարձերի ուշացումներ նույնպես չեն եղել, ինչը կարող են փաստել նաեւ մեր մարզիկները:

 

Գեւորգ Ալեքսանյան, մարզիչ 

 

Չգիտեմ, թե ովքեր են փորձում բիծ քաշել մեր ֆեդերացիայի վրա: Ըմբշամարտը, որտեղ մեր մարզիկները տարբեր հաջողություններ են գրանցում, չգիտես ինչու, ցանկանում են աղավաղել: Միգուցե մենք ենք սխալ եղել, որ տարիներ շարունակ խոշոր աշխատավարձ ստացող մարզիկներին հրապարակավ չենք հայտարարել կամ լրատվամիջոցներով լուսաբանել:

 

Սամվել Գեւորգյան, ըմբշամարտի ֆեդերացիայի փոխնախագահ 

 

Պարզապես վատ մարդկանց էր պետք այս լուրը գրելը: Այսօր մենք ֆեդերացիայում տարբեր տարիքային հավաքականների ներկայացուցիչներով հավաքվել էինք ու այդպես էլ չկարողացանք հասկանալ, թե ինչու է նման բան արվել: Սա ուղղակի ծիծաղելի է, պետք չէ մեր ֆեդերացիայում նման անհեթեթ բացթողումներ փնտրել:

 

Աշախարհի ու Եվրոպայի չեմպիոն, Օլիմպիական արծաթե մեդալակիր Արսեն Ջուլֆալակյան

 

Ցավոք, բայց մեր երկրում շատ բնագավառներում բացթողումներ կան: Կարծում եմ, ավելի լավ է դրանց վերացմամբ զբաղվել, ոչ թե փնտրել սխալ տեղում: Այս նյութի հրապարակումը պարզապես առիթ հանդիսացավ, որպեսզի խոսենք մեր ֆեդերացիայում եղած լավի մասին: Սամվել Կարապետյանը չի սիրում, որ իր արածները լուսաբանվեն, իսկ այսօր, փաստորեն, դա արվեց: