ՀՀ-ն ու Շվեյցարիան քննարկում են տնտեսական կապերի խորացումը
ՀՀ վարչապետ Կարեն Կարապետյանն այսօր ասել է, որ Շվեյցարիայի հետ անհրաժեշտ է աշխուժացնել առեւտրատնտեսական կապերը՝ հաշվի առնելով, որ այդ ոլորտում չօգտագործված մեծ ներուժ կա:
Այս մասին վարչապետն ասել է Հայաստանում Շվեյցարիայի արտակարգ եւ լիազոր դեսպան Լուկաս Գասերի հետ հանդիպմանը:
«Մենք կարեւորում ենք Շվեյցարիայի հետ համագործակցությունը եւ հետաքրքրված ենք բոլոր բնագավառներում դրա հետագա զարգացմամբ»,- ասել է Կարեն Կարապետյանը:
Մասնավորապես, վարչապետը կարեւորել է օդային ուղիղ կապերի հաստատումը, ինչպես նաեւ հանգամանքը, որ Հայաստանն օգտվում է Շվեյցարիայի կողմից տրամադրվող Արտոնությունների ընդհանրացված համակարգի (GSP) արտոնյալ ռեժիմից:
Դեսպանը համակարծիք է եղել, որ տնտեսական համագործակցության ներուժն ավելին է, քան օգտագործվում է, եւ Շվեյցարիան եւս կարեւորում է երկկողմ տնտեսական կապերի խորացումը:
Լուկաս Գասերը ողջունել է օդային ուղիղ հաղորդակցություն հաստատելու առաջարկությունը եւ գործընթացը սկսելու հարցում աջակցության պատրաստակամություն հայտնել:
Կողմերը քննարկել են գյուղատնտեսության, զբոսաշրջության, տեղեկատվական տեխնոլոգիաների, այլընտրանքային էներգետիկայի, դեղագործության ոլորտներում համագործակցության հեռանկարները: