Ucom-ի աջակցությամբ եւս երկու ընտանիք կայուն եկամուտ ապահովելու հնարավորություն է ստացել

<p><strong>Ucom հիմնադրամի եւ Վորլդ Վիժն Հայաստանի համատեղ ջանքերով իրականացվող «Պահենք երեխաներին ընտանիքում» բարեգործական նախագծի շնորհիվ Ucom-ի բաժանորդներն այս ամիս եւս աջակցեցին երկու ընտանիքի` կայուն եկամտի աղբյուր ստեղծելու գործում: </strong><br /><br />Այս անգամ աջակցությունը տրամադրվել է Սյունիքի մարզում բնակվող երկու զավակների ծնողներ՝ Զաքարյանների եւ հինգ զավակներ ունեցող Բալայանների՝ ոչ լրիվ ընտանիքներին:<br /><br />Զաքարյանների ընտանիքը բնակվում է բարեկամներից մեկի տանը, ծանր սոցիալ-տնտեսական պայմաններում: Ծնողներն ունեն բարձրագույն կրթություն, սակայն ապահովված չեն աշխատանքով եւ հնարավորություն չունեն հոգալու իրենց երկու տղաների նվազագույն կարիքները: Զաքարյանների ավագ որդին մանկուց հաշմանդամ է, ունի մանկական ուղեղային կաթվածի ախտորոշում: Ընտանիքի եկամտի աղբյուր են հանդիսանում հոր հաշմանդամության թոշակը եւ ընտանեկան աղքատության նպաստը, որը բավարար չէ Զաքարյանների անգամ ամենաառաջնային կարիքները հոգալու համար։ Ու թեպետ ընտանիքում սոցիալապես ծանր պայմանների հետեւանքով բարդ իրավիճակ է ստեղծվել, ծնողները մեծ սիրով եւ հոգատարությամբ են շրջապատել իրենց զավակներին:  <br /><br />Բալայանների ընտանիքում մայրը պատրաստվում էր իր հինգերորդ զավակին ունենալ, երբ ամուսինը հանկարծամահ եղավ սրտի կաթվածից՝ թողնելով երեխաների խնամքն ու դաստիարակությունը կնոջ ուսերին: Տունը, որտեղ բնակվում է Բալայանների ընտանիքը խիստ անբարվոք վիճակում է, եկամտի աղբյուրն էլ՝ ընտանեկան աղքատության նպաստն ու երեխաների միակողմանի ծնողազրկության թոշակն են, ինչը նույնպես բավարար չէ երեխաների առաջնային կարիքները հոգալու համար: <br /><br />Ծրագրի շրջանակներում, հաշվի առնելով Զաքարյանների ընտանիքի մոր՝ կարուձեւ անելու հմտություններն ընտանիքի սոցիալ-տնտեսական վիճակի բարելավման գործում, Ucom Հիմնադամի կողմից նրան տրամադրվել են աշխատանքային գործիքներ եւ անհրաժեշտ պարագաներ՝ կարի մեքենա, մաքրակար անելու մեքենա, արդուկ, կտորեղեն եւ այլն: Իսկ Բալայանների ընտանիքի մորը տրամադրվել է կով, հորթ, անասնակեր, ապահովվել են տան նվազագույն սանիտարահիգիենիկ պայմանները, երեխաներին տրամադրվել է հագուստ եւ անկողնային պարագաներ: Այս ամենն ընտանիքներին կօգնի կայուն եկամուտ ապահովել ու բարելավել իրենց սոցիալ-տնտեսական վիճակը:<br /><br />Երկու ընտանիքների մայրերն այժմ վստահ են, որ արդեն կկարողանան ապահովել իրենց զավակների առաջնային կարիքները եւ երեխաներին պահել տանը՝ ծնողական հոգածության ներքո: <br /><br />«Այսօր եզրափակում ենք այս տարվա SMS-հանգանակությունների ընթացքը, որի միջոցով Ucom ընկերության բաժանորդներն օգնում էին կայուն եկամտի աղբյուր ստեղծել ծայրահեղ աղքատության մեջ հատնված ընտանիքների համար։ Ծրագրի իրականացման երեք տարիների ընթացքում 49 ընտանիք աջակցություն է ստացել SMS-ների միջոցով հավաքված ու Ucom-ի կողմից կրկնապատկված գումարի շրջանակներում»,- ասել է Ucom ընկերության բրենդի զարգացման եւ հաղորդակցության բաժնի ղեկավար Աշոտ Բարսեղյանը։ <br /><br />«Վորդ Վիժն Հայաստանի եւ Ucom Հիմնադրամի համատեղ ծրագրի շրջանակներում Զաքարյանների ընտանիքին տրամադրեցինք կարի ծառայություններ մատուցելու հնարավորություն, տիկին Անահիտին ներգրավեցինք տարբեր դասընթացներում ու օգնեցինք զարգացնել իր հմտությունները: Իսկ տիկին Վերոնիկայի ընտանիքին ոչ միայն նյութական օժանդակություն է տրամադրվել, այլեւ աջակցություն՝ Վորլդ Վիժնի կողմից կազմված ընտանիքի անհատական զարգացման պլանի հիման վրա: Երկու պարագայում էլ կայուն եկամտի աղբյուր ստեղծելով կանխարգելեցինք երեխաների՝ գիշերօթիկ հաստատությունում հայտնվելը»,- նշել է Վորլդ Վիժն Հայաստանի մարկետինգի բաժնի ղեկավար Արտակ Օրդյանը։</p>