Հարությունյան. Տեսնելով բոլորի ջերմ վերաբերմունքը՝ չեմ կարող հեռանալ սպորտից
Վերջապես հայրենիք էին վերադարձել մեր օլիմպիական մեդալակիրները՝ անսահման ուրախություն ու հպարտություն պարգեւելով ողջ հայ ժողովրդին:
Երկրպագուները շատ ջերմ էին ու ոգեւորված: Այդ ամենը փոխանցվեց նաեւ բոլոր մարզիկներին:
Հունահռոմեական ոճի ըմբիշ Միհրան Հարությունյանը, որից մրցավարները Ռիոյում պարզապես խլել են ոսկե մեդալը, տեսնելով այդ ամենը, այսպես արձագանքեց.
«Անչափ մեծ սեր եմ զգում, իսկ դա ամենակարեւորն է: Այնքան մարդիկ են եկել, անբացատրելի զգացողություններ ունեմ: Այս ամենը տեսնելով՝ հենց այնպես սպորտից չեմ կարող հեռանալ: Բոլորից անչափ շնորհակալ եմ»,- ասել է նա:
ՀԱՕԿ-ի նախագահ Գագաիկ Ծառուկյանն էլ, ինչպես խոստացել էր, օդանավակայանում Հարությունյանին պարգեւատրեց ոսկե մեդալով: Նրա ու հայերի համար Օլիմպիական չեմպիոնը հենց Հարությունյանն է:
Ավելի վաղ, ըմբիշը հայտարարել էր, որ հիասթափված է ու ցանկանում է թողնել ըմբշամարտը: