Әлем таныған Астана шежіресі - Тәуелсіздік тарихымен ұштасады! (ФОТО)

АСТАНА. ҚазАқпарат - Бүгінгі күні кәмелет жасқа толып, аз ғана жылдың ішінде әлем таныған әсем қалалардың қатарынан көрінген Астананың Тәуелсіздік тарихындағы орны ерекше. Тіпті, Тәуелсіздік жылдарындағы басты жетістіктерінің бірі ретінде де, өткен жылдардағы «жеті кереметтің» біріншісі ретінде де жұрт осы алаштың айбынды Астанасын ауызға алады. Өткен 18 жыл аралығында әлем Астананы Қазақ елінің бас қаласы ретінде танып қана қойған жоқ, Еуразия кіндігіндегі ең белсенді орталыққа, әлемдік деңгейдегі шешімдер қабылданатын орталыққа айналғанын да мойындап отыр. Ал бұл деңгейге Қазақтың Бас қаласы қалай жетті? Осыған үңіле түсу үшін он сегіз жыл бұрын Қазақстанның бүкіл әлемге жар сала жаңа астанасын таныстырғаннан бүгінгі дамыған кезеңіне дейінгі тарихына назар аударуды жөн санаған едік.