«Хезмәт хакың аз!» Укытучы ир-ат акча өчен битәрләгән хатынын үтергән, өч бала ятим

Красногорск шәһәрендә яшәүче ир-ат хатынын үтергән. Ул укытучы булып эшли. Хатыны аны хезмәт хакы аз булган өчен битәрләгән, гел талаш чыгарган. Бу турыда «Московский комсомолец» хәбәр итте.

Математика һәм информатика укытучысы булып эшләүче ир-ат 3 декабрьгә каршы төндә хатынын үтерә. Аларның 3 баласы бар. Хатын гел ирен акчасы аз булган өчен битәрли, хыянәт итә, дип шикләнә.

Фаҗига 3 бүлмәле фатирда була. 41 яшьлек хатын үзе эшләми, хуҗабикә була. Бу көнне ул өй җыештырып йөри, 3 баласын йокларга яткырырга маташа. Аларга 9дан 12гә кадәр яшь.

Шул чакта әтиләре кайта. Ир-ат, хатыны үтенече буенча, эштән соң Захарково авылына барган. Биредә ул атасының шәхси йортында ватылган казанны төзәтергә һәм кайбер әйберләрне алып кайтырга тиеш була.

Салкыннар башлангач, гаилә ашыгыч рәвештә Красногорскига күченгән булган, ә биредә ремонт тәмамланмаган. Ә авылдагы өйдә казан ватылган, салкын булган.

Ире соң кайту хатынга ошамый – ул хыянәт иткән дип шикләнә башлый. Алар талашырга тотына. Балаларны уятмас өчен, йокы бүлмәсенә кереп талашалар. Ата-анасы бүлмәсендә сәер тавышларны 9 яшьлек уллары ишетә. Тик ул куркып, күзләрен йомып, йокыга китәргә маташа.

3 декабрьдә иртән-иртүк әти кеше балаларын уята. Алар мәктәпкә барырга тиеш була. Әтиләре аларны, киендереп, тиз генә озата. Балалар әниләрен кочакларга йокы бүлмәсенә кермәкче була, әтиләре кертми.

Соңрак килгән табиблар хатынның үлемен раслый. Аның кул-аякларында, муенында, битендә кара янган урыннар була, травмалар, хатынны буып үтергәннәр, дигән шик уята. Хокук саклаучылар ирне тоткарлый.

Соңрак билгеле булганча, хуҗабикә хатын ирен аз акча эшләүдә гаепли. Укытучының бөтен хезмәт хакы фатир белән шәхси йортны ремонтлауга китеп бетә. Хатын хыянәттә дә шикләнә, гел талаш чыгара. Туганнары сүзләренчә, ир исә бөтен акчасын хатынына биреп бара, үзе аскетларча яши, мәктәптә эш көненнән соң фатирда да, дачада да ремонт ясый, кибетләргә йөри, төзелеш материаллары ала, укытучыларның квалификациясен арттыру курсларында да укый.

Ел башында гаилә башлыгы, сөйгәнен тынычландырыр өчен, авылдагы җирнең бер өлешен хатыны исеменә яздыра. Туганнары сүзләренчә, ул аңа барысын да бирергә әзер була – гаилә генә бәхетле булсын.

Хәзер аларның балаларын кем опекага аласын хәл итәләр. Тикшерү бара, диелә хәбәрдә.